मर्चवार विकासका लागि नयाँ जग हाल्न जरुरी छः कांग्रेस उम्मेदवार मिश्र

पब्लिक कुरा
२०८२ फाल्गुन ७

1228 Share

भैरहवा– रुपन्देहीको पिछडिएको क्षेत्रको उदाहरण दिनु पर्यो भने सबैले मर्चवार देखाउँछन् । वर्षौदेखि विकासे संघसंस्थादेखि दल र नेताले मर्चवारको गरिबी र अभाव देखाएरै राजनीति पूरा गरिरहेका छन् । मर्चवारको भूगोल र त्यहाँका जनताको अवस्था परिवर्तन भएमा आफ्नो राजनीति अन्त हुने चिन्तामा धेरै दल र उम्मेदवार देखिन्छन् । त्यसैले नेताहरु आफ्नो अवस्था परिवर्तन गर्न केन्द्रित भए पनि मर्चवार फेर्न तयार नरहेको गुनासो बढेको छ ।

नेपाली कांग्रेसबाट रुपन्देही–४ का उम्मेदवार आशुतोष मिश्रले पनि परम्परा तरिकाले गफ मात्र गरेर मर्चवारको अवस्था फेर्न सम्भव नरहेको बताएका छन् । मर्चवार बदल्न विकासको नयाँ जग हाल्नु पर्ने उनले बताए । प्रचार अभियानका क्रममा मर्चवारका ग्रामीण क्षेत्रमा पुगिरहेका उनले समाजमा व्याप्त अभाव र गरिबी प्रत्यक्ष्य देखिरहेको बताए । विकास पूर्वाधार शुन्य रहेको साक्षात देख्न पाएको र त्यस्ता ठाउँको अवस्था देखेर आफू विचलित भएको उनले बताए ।

उनका अनुसार मर्चवारका गाउँ नेपालका दुर्गम भनिएका जिल्ला भन्दा पनि पछाडि रहेका छन् । पछिल्लो समय बरु विकट जिल्लामा विकास पुगिसकेको छ । ‘तर, अन्तराष्ट्रिय विमानस्थलबाट २२–२५ किलोमिटर दूरीमा रहेको मर्चवार यातायात असुविधा झेलिरहेको छ,’ उनले भने, ‘यहाँको मुख्य नहरको सडक जम्मा पाँच किलोमिटर पक्कि छ । त्यो पनि बजेट अभाव देखाएर अधुरै छाडिएको छ ।’

बहुवर्षीय योजनामा अन्तर्गत राखिएको सडक बजेट अभाव भन्दा विकास नगर्ने सोचका कारण अलपत्र परेको उनले बताए । मुलुकको विकास बजेट जम्मा २२ प्रतिशत खर्च भइरहेका बेला बजेट अभाव देखाएर सडक अपुरो छाड्नु यहाँका जनप्रतिनिधिको अक्षमता भएकोे उनले बताए । ‘बजेट अभाव देखाएर काम नगर्ने कर्मचारीको प्रवृत्ति हो,’ उनले भने, ‘दबाब दिन नसक्नु जनप्रतिनिधिको कमजोरी हो ।’ मर्चवारको अभाव हेर्दा विकास गर्नु पर्ने धेरै ठाउँ रहेको उनले बताए ।

त्यसैले मर्चवारको विकासका लागि नयाँ जग हाल्नु पर्ने उनले बताए । ‘अत्यन्तै गरिबी छ,’ उनले भने, ‘विपन्नहरु गाउँमा दुःख सहेर बसेका छन् ।’ उनका अनुसार मर्चवारका पढेलेखेका व्यक्ति दुई–तीन पुस्तादेखि नै बसाइँ सरेर सहरोन्मुख भइसकेका छन् । आर्थिक अवस्था न्यून भएका परिवार मात्र गाउँमा सिमित रहेकाले उनीहरुका लागि विकास र पूर्वाधार आवश्यक छन् । ‘सडक राम्रो, सिंचाई सुविधा, शिक्षा, स्वास्थ्य राम्रो भइदियो भने जनता सुखी हुने थिए,’ उनले भने, ‘आधारभूत आवश्यकताका सुविधा नभएर यहाँका मानिस गरिब हुन बाध्य छन् ।’