मर्चवारको हराभरा जमिनमा सिंचाईंको प्रवन्ध मुख्य एजेण्डाः कांग्रेस उम्मेदवार मिश्रा

Advertisement

भैरहवा– रुपन्देहीको सबैभन्दा धेरै उर्वर जमिन रहेको मर्चवार क्षेत्रका किसान बाह्रैमास सिंचाईंका लागि हार गुहार गर्छन् । तर, अहिलेसम्म निर्वाचित जनप्रतिनिधिले सिंचाईं सुविधा उपलब्ध गराउन सकेका छैनन् । चुनावका बेला सिंचाईं र मलखादको व्यवस्थापन मुख्य प्राथमिकता रहेको बताउने उम्मेदवार निर्वाचन जितेर गएपछि मर्चवार भुल्छन् ।

Advertisement

मर्चवारमा उम्मेदवार बनेका अधिकांश व्यक्तिका भैरहवा र काठमाडौंमा घर छन् । त्यसैले अत्यावश्यक काम बाहेक चुनाव जितेका उम्मेदवार मर्चवार फर्किंदैनन् । त्यसैले स्थानीय बासिन्दा जहिल्यैं अभिभावकबिहीन भएको दुखेसो गर्दै आएका छन् । यसपटक रुपन्देही–४ मा नेपाली कांग्रेसबाट उम्मेदवार बनेका आशुतोष मिश्राले मर्चवारमा सिंचाईंको प्रवन्ध मिलाएर हराभरा तुल्याउने एजेण्डा अगाडि सारेका छन् ।

मिश्राले खेत–खेतमा सिंचाईं नारा नै बनाएका छन् । साथै किसान मैत्री र आधुनिक कृषिमा जोड दिएका छन् । मर्चवारका लागि सबैभन्दा खाँचो भनेकै सिंचाईं, मलखाद र बीउ बीजनको हो । यसैलाई आधार मानेर मिश्राले सिंचाईं सुविधा पुर्याउने एजेण्डा एक नम्बरमा राखेका छन् । ‘मर्चवारमा जति खेतियोग्य जमिन अन्त छैन,’ उनले भने, ‘त्यसैले सिंचाईं व्यवस्था गर्ने कुरालाई एक नम्बर प्राथमिकता बनाएको हुँ ।’

उनले दोस्रो प्राथमिकतामा स्वास्थ्यलाई राखेका छन् । भौतिक पूर्वाधारमा पछाडि परेको मर्चवार लगायत ग्रामीण क्षेत्रमा सुविधा सम्पन्न अस्पताल छैनन् । त्यहाँका बासिन्दा उपचारका लागि भैरहवा, बुटवल र छिमेकी मुलुक भारतमा निर्भर छन् । त्यसैले मिश्राले आफ्नो क्षेत्रका अस्पताल स्तरोन्नतीलाई मुख्य एजेण्डा बनाएका छन् । ‘मातृ–शिशु तथा आपतकालीन सेवालाई बिशेष जोड दिइनेछ,’ उनले भने, ‘त्यही अनुसार प्रचार गरिरहेको छु ।’

यसका साथैं सडक र पूर्वाधारलाई विशेष जोड दिएका छन् । मर्चवारको मेरुदण्डका रुपमा रहेको एउटै सडक पनि जीर्ण छ । साथै मानवीय बिकासका लागि आवश्यक भौतिक पूर्वाधारको अभाव छ । त्यसैले आफ्नो क्षेत्रमा कालोपत्रे सडक र गाउँ–बस्ती जोडने पहुँच मार्ग निर्माणमा बिशेष जोड दिने उनले प्रतिवद्धता जनाएका छन् ।

आफ्नो क्षेत्रमा शिक्षा र रोजगारी प्रमुख समस्याका रुपमा रहेको उनले बताए । अहिले रहेका विद्यालय र क्याम्पसको स्तरोन्नती जरुरी रहेको मिश्राले जनाए । साथै विद्यालय र बस्तीमा खानेपानी र सरसफाईलाई पनि व्यवस्थित गरेर अगाडि बढ्ने उनको प्रतिबद्धता छ ।