रूपन्देही–४ का कांग्रेस उम्मेदवार मिश्र विकासका एजेण्डासहित घरदैलोमा

पब्लिक कुरा
२०८२ फाल्गुन ४

1119 Share

भैरहवा– नेपाली कांग्रेस रुपन्देही–४ का उम्मेदवार आशुतोष मिश्रले क्षेत्र बिकासका एजेण्डासहित सोमबारबाट मर्चवारमा घरदैलो सुरु गरेका छन् । आइतबारसम्म मतदातासित भेटघाट गरेर भुलाकुसारी र अपेक्षा संकलन गरेका मिश्रले मर्चवार लगायत निर्वाचन क्षेत्रको मुहार फेर्ने बिकास एजेण्डासहित घरदैलोमा पुगेका छन् ।

स्थानीय पार्टी समितिसित समन्वयमा सोमबार उनले सम्मरीमाई गाउँपालिकाको थुमहुवा र पिपरियामा घरदैलो गरेका हुन् । सोमबार बिहानैंबाट मतदाताको घरदैलोमा पुगेर स्थानीयका समस्या सुन्ने र आफ्ना एजेण्डा बुझाउन थालेको उनले बताए । उनको घरदैलोमा पार्टीका नयाँ–पुराना कार्यकर्तासँगैं महिलाको पनि उलेख्य सहभागिता थियो ।

बिहान थुमहवा बस्तीका घर–घर पुगेका उनी मध्यान्हपछि पिपरिया बस्तीका घरदैलोमा पुगेका थिए । मत माग्ने क्रममा आफूले मर्चवारका समस्या बुझेको र समाधानका लागि कुनै कसर बाँकी नराख्ने उनले बताउने गरेका छन् । यसपटक पार्टी बदलिएको जानकारी गराउँदैं बिकासमा पछाडि परेका बस्ती बिकासका लागि सभापति गगनकुमार थापाले नै खाका प्रस्तुत गरिसकेको उनले बताए । उक्त खाका र आफूले मर्चवार लगायत रुपन्देही–४ को बिकास लागि योजना तयार गरेको मिश्रले जनाए ।

घरदैलोका क्रममा उनले जेष्ठ नागरिकलाई ढोग्दैं सरकार र पार्टीले नागरिकको हितमा तय गरेका योजना लागू गर्न भूमिका खेल्ने बताएका थिए । क्षेत्रका १५ वडामा आफूले घरदैलो पूरा गरिसकेको र सोमबार १६ औं वडामा घरदैलो गरिरहेको जानकारी दिए । ‘मेरो क्षेत्रका अधिकांश ठाउँमा विकास निर्माणका न्यूनतम काम पनि भएका छैनन्,’ उनले भने, ‘त्यो देख्दा म विचलित पनि भएँ, अहिलेसम्म सामान्य काम पनि भएको पाइएन ।’

निर्वाचन क्षेत्रको भ्रमणका क्रममा मर्चवार मुलुकका अति विकट जिल्ला जुम्ला, कालिकोट, हुम्ला भन्दा पनि पछि परेको अवस्था देखेको बताए । ‘तर, अहिले ती विकट जिल्लामा बिकास निर्माण पुगिरहेको छ,’ उनले भने, ‘तर, सदरमुकामबाट २५ किलोमिटर टाढा रहेको मर्चवारमा अहिलेसम्म किन बिकास पुग्न सकेन ? मतदाताले सोच्नु पर्ने बेला भएको छ ।’ उनले आफूले जिते मर्चवारको मुहार फेर्ने दावी गरे । उनले आफू निर्वाचित भए क्षेत्रमा गर्ने कामका योजना बोकेर घरघर पुगिरहेका छन् ।