February 8, 2025, Saturday
२०८१ माघ २६

‘विरामीलाई सस्तो दरमा गुणस्तरीय सेवा दिनेगरी क्यान्सर अस्पताल संचालन गर्दैछौं’

अहिले पनि क्यान्सर रोगको उपचारका लागि नेपालका पश्चिम क्षेत्रका नागरिकहरू काठमाडौं, चितवन अथवा भारत पुग्नुपर्ने बाध्यता छ । क्यान्सर रोगका बिरामीहरू टाढा जानुपर्ने बाध्यात्मक परिस्थितिका कारण दुःख पाउने गरेका छन् । यही कुरालाई मध्यनजर गर्दै भैरहवास्थित सिद्धार्थनगर सिटी अस्पतालका प्रबन्ध निर्देशक अर्जुन पौडेल नेतृत्वको टिमले भैरहवामा सुमित्रा मेमोरियल क्यान्सर अस्पताल खोल्न तिव्र तयारी गरिरहेका छन् । यहाँ पब्लिक कुराले निर्माणको तयारीमा रहेको क्यान्सर अस्पतालबारे संचालक पौडेलसँग कुराकानी गरेको  छ। प्रस्तुत छ, पौडेलसँग गरिएको कुराकानीको सारसंक्षेप ।

Advertisement

भैरहवामा यहाँहरुले क्यान्सर अस्पताल खोल्ने तयारी गरिरहनुभएको छ, तयारी कहाँ पुग्यो ?
हो, हामीले भैरहवामा सुमित्रा मेमोरियल क्यान्सर अस्पताल खोल्ने तिव्र तयारीमा छौं । अहिलेसम्म कागजी तयारीले पूर्णता पाइसकेको अवस्था छ । अब, केही समयपछि हामी कन्स्ट्रक्सन (निर्माण) को काम अगाडि बढाउने छौं । प्रक्रियागत काम भने हामीले २०७८ सालबाट नै सुरु गरेका थियौं । यो अवधिमा हामीले जग्गा व्यवस्थापन लगायत वातावरणीय रिपोर्ट बनाउने काम भयो । कागजी काम सकिएकाले अब, धमाधम भौतिक पूर्वाधारको काम सुरु गर्दैछौं ।

मिति नै भन्नु पर्दा क्यान्सर अस्पताल निर्माण कहिलेदेखि सुरु हुन्छ ?
मैले माथि नै भनिसकेँ, कागजी काम सकिएको । अब, २ देखि ३ महिनामा निर्माणको काम थाल्छौं । यही बुझौं २०८२ साल वैशाखबाट अस्पतालको तीव्र रुपमा निर्माणको काम सुरु हुनेछ । २०८३ भित्र अस्पताल संचालनमा आउने गरीका काम अगाडि बढाएका छौं ।

भैरहवामै क्यान्सर अस्पताल खोल्ने निर्णयमा किन पुग्नुभयो ?
दैनिकरुपमा यो रोगका विरामी बढीरहेका छन् । तर, नजकि अस्पताल नहुँदा टाढा धाउनुपर्ने बाध्यता छ । यसको अन्त्य गर्ने हाम्रो चाहना हो । अर्कातर्फ क्यान्सर रोगबाट मेरो आमाको पनि मृत्यु भएको थियो । साथै परिवारका अन्य केही सदस्यको पनि यही कारणबाट मृत्यु भएको थियो । भैरवा मेरो जन्मभूमि हो । आफ्नो जन्मभूमि भैरहवामा पनि केही गरौं र यस भैरवालाई पनि एउटा मेडिकल हबको रुपमा पहिचान गराऔं भन्ने उद्देश्य हो । साथै भैरवाको नजिकै रहेका भारतीय बिरामीहरू पनि यहाँ उपचारका लागि आउने धेरै सम्भावना छ । यस क्षेत्रमा क्यान्सरको उपचार गर्ने अस्पताल धनगढी देखि लिएर नारायणगढसम्म नरहेको हुँदा बिरामीहरुलाई पनि सेवा दिन सकिने, यातायात लगायत अन्तर्राष्ट्रिय एयरपोर्ट भैरहवामै रहेको र यस सेवा दिनका लागि भैरहवा क्षेत्र उपयुक्त मान्यौ । यसैले पनि भैरहवालाई छनोट गरेर अस्पताल खोल्ने निर्णयमा पुग्यौं ।

क्यान्सर अस्पताल कति लगानीमा निर्माण हुँदैछ ? लगानीकर्ता को–को हुनुहुन्छ ?
क्यान्सर अस्पताल खोल्नु नै सबैभन्दा महत्वपूर्ण कुरा हो । लगानीकै कुरा गर्दा यो अत्यन्त धेरै लगानी लाग्ने अस्पताल हो । तर, यस क्षेत्रमा हाम्रो विगतको लामो अनुभव रहेको र अनुत्पादक तरिकाले, अवैज्ञानिक तरिकाले लगानी गर्दा यसको लागत खर्च धेरै आउने जसले गर्दा भविष्यका दिनहरूमा क्यान्सर सेवा धेरै महँगो हुने हुँदा र यसमा हामी अत्यन्त संवेदनशील छौँ । जसले गर्दा भविष्यका दिनमा बिरामीलाई निकै सस्तो दरमा सेवा दिनुपर्छ भन्ने धारणा अनुसार काम गरिरहेका छौं । लागतकै कुरा गर्दा १ अर्ब ५० करोड भित्र नै पुरा गर्ने योजना बनाएका छौं । सुरुमा अस्पताल एक सय बेडको हुनेछ । संचालनको केही समयपछि स्तरबृद्धि गरी २ सय बेड क्षमतामा संचालन गर्ने गरी काम गरिरहेका छौं । यस अस्पतालमा अमेरिका लगायत विदेशका क्यान्सर अस्पतालमा काम गर्नुभएका केही विशेषज्ञहरूको लगानी रहनेछ । उहाँहरु आफ्नै देशमा फर्केर यसै अस्पतालमा काम गर्नुहुनेछ । साथै युरोप बेलायतमा पनि कार्य गरिरहनुभएका युवाहरूको आफ्नो देश फर्केर केही गरौँ भन्ने भावनाका साथ यस अस्पतालमा लगानी गर्दै हुनुहुन्छ । साथै नेपालमै रहनुभएका सफल व्यवसायीहरु पनि लगानीकर्ताकारुपमा रहनुभएको छ ।

यस क्षेत्रमा क्यान्सर अस्पतालको कस्तो सम्भावना देख्नुहुन्छ ?
यस अस्पतालको सम्भावना धेरै छ । पहिलो धनगढीदेखि नारायणगढसम्म सेवा छैन । नजिकै उत्तर प्रदेश राज्य रहेको र साथै नजिकै रहेको अन्तर्राष्ट्रिय एयरपोर्ट आदिले गर्दा धेरै सम्भावना रहेको हामीले देखेका छौं ।

अस्पताल निर्माणको तयारी गरिरहँदा सरकारी पक्ष र स्थानीयबाट साथ, सहयोग र प्रतिक्रिया कस्तो पाउनुभएको छ ?
यस अस्पताल निर्माणको क्रममा विगत तीन वर्षभन्दा अगाडिबाट हामी लागिरहेका छौं । कागज प्रक्रिया लामो हुने हुँदा हामी धेरै कागज प्रक्रियामा काम गरिरहेका छौं, जसको लागि क्यान्सरका विशेषज्ञ डाक्टर सागर पोखरेल लगायतको टिमले सहयोग गरिराख्नु भएको छ । स्थानीयस्तर र सरकारबाट सहयोग पनि भएको छ । विशेषगरी अब स्थानीयस्तर र सरकारबाट सहयोग लिने अवस्था बढी आउनेछ अपेक्षा राख्दछौं । स्थानीयस्तर र सरकारबाट पूर्ण रुपले सहयोग पाइनेछ भन्ने नै हो ।

पछिल्लो समय भैरहवा क्षेत्र ठूला अस्पतालहरुको हब बनिरहेको छ, यो भीडमा यहाँहरुले क्यान्सर अस्पताललाई कसरी आमनागरिक माझ विश्वसनीय बनाउनुहुन्छ ?
अहिलेको अवस्था हेर्दा भैरहवा एउटा मेडिकल हबको रुपमा देखिएको छ । यहाँ मेडिकल कलेज, आँखा अस्पताल लगायत अन्य अस्पतालहरु पनि निर्माण हुँदैछन् । यो भैरवाबासीको लागि अत्यन्त खुसीको खबर हो । अझै यसमा पनि यस क्यान्सरको प्रोजेक्टले एउटा कोसे ढुङ्गा थपेको छ । यसले भैरवा क्षेत्रलाई नै विकास गर्नलाई महत्वपूर्ण भूमिका खेल्नेछ । विशेष गरी मेरो भाइ डाक्टर सागर पोखरेल लगायतको टिमहरूको इच्छा, तत्परता र सहयोगको कारणले गर्दा हामी यहाँसम्म पुगेका छौं । त्यस्तै युरोपमा रहेका मित्र हरि खत्री उहाँको पनि धेरै भूमिका छ । उहाँहरुलगायत अन्य जोडिनुभएका सम्पूर्ण साथीहरूको पनि महत्वपूर्ण भूमिका रहेको जानकारी गराउन चाहन्छु । अर्को कुरा यस अस्पताल सञ्चालनका लागि विशेष गरेर हामी विदेशका अस्पतालहरूसित पनि सहकार्य गरी कार्य गरिरहेका छौं । उपकरण तथा प्रविधिहरू अहिले नयाँ लेटेस्ट प्रयोग गरिनेछ र मेडिकल टिम पनि दक्ष रहनेछ । जसले गर्दा हामी स्थानीयस्तरमा पनि सुपथ मूल्य लिने गरी गुणस्तरीय सेवा प्रदान गर्नेछौं ।