रवि लामिछाने भन्छन्– सरकारको नियतमा कुनै शंका छैन

पब्लिक कुरा
२०८३ श्रावण २

820 Share

राष्ट्रिय स्वतन्त्र पार्टी (रास्वपा) का सभापति रवि लामिछानेले वर्तमान सरकारको नियतमा कुनै शंका नरहेको बताएका छन्।

शनिबार सिंहदरबारस्थित रास्वपा संसदीय दलको कार्यालयमा रौतहटका विभिन्न दलका कार्यकर्तालाई पार्टीमा स्वागत गर्दै उनले सरकारको नियतमा शंका नगर्न आग्रह गरेका हुन्।

सरकारले गर्ने निर्णयहरूमध्ये कहिलेकाहीँ केही निर्णयमा समस्या वा विवाद आउनु स्वभाविक भएको भन्दै उनले त्यस्ता कमजोरीलाई सच्याउन सकिने बताए।

उनले भने, ‘सरकारको नियतमा कुनै पनि शंका छैन। निर्णयहरूमा कहिलेकाहीँ समस्याहरू आउन सक्छ। त्यसलाई करेक्सन गर्न सकिन्छ। नियत खराब भयो भने कहाँ करेक्सन गर्ने? नियत करेक्सन गर्न गाह्रो हुन्छ। निर्णय गर्दा दुई–चार वटा निर्णयले विवाद ल्याउन सक्छ।’

सरकारका निर्णयहरूलाई पूर्ण रूपमा व्यवहारमा उतार्न र तिनको प्रभाव मूल्यांकन गर्न केही समय लाग्ने भन्दै सभापति लामिछानेले केही समय धैर्यता राख्न आग्रह गरे।