गरगहना लुट्ने भारतीय नागरिक सहितको गिरोह पक्राउ, वालवालिका समेतको प्रयोग

Advertisement

भैरहवा–बढी भिडभाड हुने स्थानमा सुनको गरगहना लुट्ने भारतीय नागरिक सहितको संगठित एउटा गिरोहलाई रुपन्देही प्रहरीले पक्राउ गरेको छ । गहना लुट्नमा वालवालिका र भाग्नकालागि गाडीको समेत प्रयोग गर्ने गरेको रहस्य प्रहरीको अनुशन्धानबाट खुल्न आएको छ ।

Advertisement

पछिल्लो समय आपराधिक गतिविधि नियन्त्रणमा सक्रियता बढाएको रुपन्देही प्रहरीले रुपन्देहीको शुद्धोधन गाँउपालिका–४ मा लागेको हाटबजारबाट उक्त गिरोहलाई पक्राउ गरेको हो । लुटेर भाग्नकालागि प्रयोग गरिएको एउटा स्कारपियो गाडी र एक नावालक सहित पाँचजनालाई प्रहरीले पक्राउ गरेको छ ।

जिल्ला प्रहरी कार्यालय रुपन्देहीका डिएसपी तथा सूचना अधिकारी कृष्ण कुमार चन्दले हाटबजारमा भएको भिडभाडको मौका छोपी एक व्यक्तीको घाँटीमा लगाएको करिव २ तोला सुनको सिक्री थुतेर भागिसकेको लुटेराको उक्त समूहलाई पक्राउ गरिएको बताए । ‘भिडभाडमा सिक्री थुत्नकालागि वालवालिका र भाग्नकालागि गाडीको समेत प्रयोग गर्ने गरेको पाइएको छ’ चन्दले भने, ‘भारतीय र वीरगञ्जदेखिका संगठित गिरोह हाटबजारमा छरिएर गरगहना लुट्ने र गाडीबाट भाग्ने गरेको प्रारम्भिक अनुशन्धानबाट देखिएको छ ।’

पक्राउ पर्नेमा, सिद्धार्थनगर नगरपालिका–११ का अकलेश बृजवासी, वीरगंज महानगरपालिका–२० का राजन राय, वीरगंज महानगरपालिका–१६ का एक बालक, वीरगंज महानगरपालिका–१६ कै अमन राय र भारतको बिहारस्थित मोतिपुर रामगणवा थानाका मोहम्मद इमाम रहेका छन् ।

उनीहरुको साथबाट बा १९ च ४३७७ नम्बरको स्कारपियो गाडी, लुटेको सुनको सिक्री र चार थान मोबाइल प्रहरीले बरामद गरेको छ । अन्य स्थानमा भएका गरगहना.लुटपाटका घटनामा उनीहरुको संलग्नता र अन्य बिषयमा बिस्तृत छानबिन जारी रहेको डिएसपी चन्दले बताए ।