दङका कम्युनिष्ट नेता बस्नेतको निधन, मुख्यमन्त्री आचार्यद्वारा श्रद्धाञ्जली अर्पण

Advertisement

तुलसीपुर– नेकपा एमालेका पूर्व केन्द्रीय सल्लाहकार समितिका सदस्य तथा दंगाली कम्युनिस्ट आन्दोलनका अग्रज नेता शोभाराम बस्नेतको निधन भएको छ । उनी दाङ जिल्लाका पूर्वअध्यक्ष समेत हुन् । लुम्बिनी प्रदेशका मुख्यमन्त्री तथा नेकपा एमालेका केन्द्रीय सदस्य चेतनारायण आचार्यले बस्नेतको निधनप्रति श्रद्धाञ्जली अर्पण गरेका छन् ।

Advertisement

तुलसीपुरस्थित नेकपा एमाले पार्टी कार्यालयमा पुगेर मुख्यमन्त्री आचार्यले बस्नेतको पार्थिव शरीरमा पार्टीको झण्डा ओढाई अन्तिम श्रद्धाञ्जली अर्पण गरेका हुन् । बस्नेतले दाङको कम्युनिस्ट आन्दोलनलाई स्थापित र सुदृढ बनाउन पुर्याएको योगदान अविस्मरणीय रहेको बताउँदै उनीप्रति उच्च सम्मान व्यक्त गरेका थिए ।

मुख्यमन्त्री आचार्यले बस्नेत निष्ठा, त्याग र समर्पणका प्रतीक नेता भएको उल्लेख गर्दै उनको निधनले दाङको सामाजिक, सांस्कृतिक तथा राजनीतिक आन्दोलनसँगै नेकपा एमालेले अनुभवी अभिभावक गुमाएको बताए ।

लामो समयदेखि विभिन्न रोगबाट पीडित बस्नेतको उपचारका क्रममा गएराति निधन भएको हो । उनी दाङको कम्युनिस्ट आन्दोलनका अग्रज व्यक्तित्वका रूपमा परिचित थिए । पार्टी संगठन निर्माण, विस्तार तथा नयाँ पुस्तालाई कम्युनिस्ट आन्दोलनमा आबद्ध गराउन उनले महत्त्वपूर्ण भूमिका निर्वाह गरेको मुख्यमन्त्रीले जनाए ।

श्रद्धाञ्जली कार्यक्रमपछि बस्नेतको पार्थिव शरीरलाई शीतलपुर घाट लगेर अन्त्येष्टि गरिएको थियो । श्रद्धाञ्जली अर्पणमा पार्टीका नेता, कार्यकर्ता, शुभेच्छुक तथा सर्वसाधारणको उल्लेख्य उपस्थिति थियो ।