निर्वाचनः लुम्बिनीमा कतै उम्मेदवारी फिर्ता, कतै बागी कायमै
Advertisement
भैरहवा– आगामी फागुन २१ गते हुने प्रतिनिधि सभा सदस्यको निर्वाचनका लागि रुपन्देहीमा उम्मेदवारी दिएका कुल १ सय ५७ जना उम्मेदवारमध्ये शुक्रवार एकजनाले फिर्ता लिएपछि १ सय ५६ जनाको उम्मेदवार कायम भएको छ ।
Advertisement
मुख्य निर्वाचन अधिकृतको कार्यालय, रुपन्देहीका अनुसार निर्वाचन क्षेत्र नम्बर २ मा राष्ट्रिय प्रजातन्त्र पार्टीबाट उम्मेदवारी दिएकी कर्भिका थापाले आफ्नो उम्मेदवारी फिर्ता लिएकी हुन् । ‘उहाँको उम्मेदवारीका लागि राप्रपाबाट सिफारिश आएको थियो’, रुपन्देही २ का निर्वाचन अधिकृत राजेन्द्र न्यौपानेले पब्लिक कुरासँग भने, ‘आज उहाँले आफ्नो उम्मेदवारी फिर्ताका लागि निबेदन दिनुभयो । अनि फिर्ता भयो ।’
आफ्नो उम्मेदवारी फिर्ता लिएका बारेमा सार्वजनिक गर्दै थापाले आफू अध्ययनका क्रममा १४ वर्षसम्म नेपाल बाहिर रहेको र त्यही क्रममा लिएको बिदेशको स्थायी आवास अनुमती पत्र उम्मेदवारी दर्ता गरेपछि परित्याग गरे पनि हुने भन्ने बुझाइ आफ्नो रहेको जनाएकी छन् ।
‘बिदेशको स्थायी आवास अनुमती पत्र त्याग गरेको कम्तिमा तीन महिना पूरा भएपछि मात्र उम्मेदवारी दिन पाउने व्यवस्था रहेको वारेमा आफू अनभिज्ञ रहेको उनले जनाएकी छन् । ‘मसँग अहिले नेपालको बाहेक अन्य कुनै पनि मुलुकको नागरिकता तथा राहदानी छैन’, सार्वजनिक गरेको पत्रमा उनले भनेकी छन्, ‘संवैधानिक व्यवस्था र नियमलाई स्वीकार गर्नु हामी सबैको कर्तब्य हो ।’ आफ्नो उम्मेदवारी बिरुद्ध कुनै उजुरी नपरे पनि राप्रपाबाट फिर्ता लिन अनुरोध गरेको र संविधानको मर्म र भावना अनुरुप फिर्ता लिएको उनले जनाएकी छन् ।
आफ्नो उम्मेदवारी फिर्ता लिन चाहने उम्मेदवारका लागि निर्वाचन आयोगले शुक्रवार दिन तोकेको थियो । शुक्रवार रुपन्देही लगायत् बर्दिया, बाँके, पाल्पा, पश्चिम नवलपरासी, रोल्पा जिल्लाबाट केही उम्मेदवारले आफ्नो उम्मेदवारी फिर्ता लिएका छन् ।
बर्दियामा ३ जना उम्मेदवारले उम्मेदवारी फिर्ता लिएका छन् । उम्मेदवारी फिर्ता लिनेमा बर्दिया क्षेत्र नं. १ मा उम्मेदवारी दिएका प्रगतीशिल लोकतान्त्रिक पार्टीका उम्मेद्वार राजु रानाभाट, क्षेत्र नं. २ मा प्रगतीशिल लोकतान्त्रिक पार्टीकै उम्मेदवार नेत्रराज आचार्य र स्वतन्त्र उम्मेदवार नुतनकुमार चौधरीले उम्मेदवारी फिर्ता लिएका छन् ।
रोल्पामा २ जनाले उम्मेदवारी फिर्ता लिएका छन् । एक निर्वाचन क्षेत्र रहेको रोल्पामा स्वतन्त्र उम्मेदवार आशबहादुर पुन र दलबहादुर खत्रीले फिर्ता लिएका हुन् । पाल्पाको निर्वाचन क्षेत्र नं. २ मा स्वतन्त्र उम्मेदवार देवीप्रसाद भण्डारीले उम्मेदवारी फिर्ता लिएका छन् । भण्डारीले एमालेका उम्मेदवार ठाकुरकुमार गैरेलाई समर्थन गर्ने बताएका छन् ।
बाँकेमा निर्वाचन क्षेत्र नम्बर २ बाट २ जनाले फिर्ता लिएका छन् । मुख्य निर्वाचन अधिकृतको कार्यालय बाँकेका अनुसार जनता समाजवादी पार्टीका उम्मेदवार सरस्वतीप्रसाद बर्मा र नेपाल जनता पार्टीका उम्मेदवार विजयकुमार गुप्ताले उम्मेदवारी फिर्ता लिएका हुन् ।
केसीको उम्मेदवारी कायमै
लुम्बिनी प्रदेशका पूर्वमुख्यमन्त्री कुलप्रसाद केसीले दाङको निर्बाचन क्षेत्र नम्बर १ मा आफ्नो उम्मेदवारी कायमै राखेका छन् । लुम्बिनी प्रदेश निर्वाचन कार्यालयका सूचना अधिकारी गेहेन्द्र कुँवरले दाङ–१ बाट कसैले पनि उम्मेदवारी फिर्ता नलिएको जनाए ।
दाङ–१ मा देखिएको विवाद मिलाउनका लागि नेकपाका नेता वर्षमान पुन दाङ पुगेका थिए । दाङ पुगेर नेता पुनले उनीसँग छलफल गरेका थिए । तर केसीले उम्मेदवारी फिर्ता लिन नमान्दा उम्मेदवारी कायमै रहेको हो ।
पार्टीले मेटमणि चौधरीलाई टिकट दिएपछि उनी असन्तुष्ट बनेका थिए । उम्मेदवारी दर्तापछि केसीले देउखुरीमा प्रदेश राजधानी स्थापना गरेर इतिहास रचेको बताएका थिए । उनी पार्टीमा बागी उम्मेदवार हुन् ।
प्रतिकृया दिनुहोस्