वाचा पूरा गर्न प्रदेश छाडेर प्रतिनिभि सभा उम्मेदवार
Advertisement
भैरहवा– निश्चित कार्यकालका लागि प्रदेशसभा सदस्यमा निर्वाचित लुम्बिनी प्रदेशका केही सांसद यसपटक प्रतिनिधि सभा सदस्यका उम्मेदवार बनेका छन् । करिब दुई वर्ष कार्यकाल बाँकी छँदै प्रतिनिधि सभा ताकेका पूर्व प्रदेशसभा सदस्यले संघको हस्तक्षेपका कारण जनतासित गरिएका वाचा पूरा गर्न नसकेकाले पदबाट राजीनामा दिएको प्रतिक्रिया दिएका छन् । संघमा बसेर प्रदेश बलियो बनाउन भूमिका खेल्ने उनीहरुको भनाई छ ।
Advertisement
२०७९ सालको प्रदेशसभा निर्वाचनमा रुपन्देही–४(१) बाट निर्वाचित कन्हैया बनिया एक साताअघि राजीनामा दिएर रास्वपा प्रवेश गरे । लोकतान्त्रिक समाजबादी पार्टीबाट उनी प्रदेशसभा सदस्य निर्वाचित थिए । अहिले रास्वपा प्रवेश गरेर रुपन्देही–४ बाट प्रतिनिधि सभा सदस्य उम्मेदवार बनेका छन् । अहिलेको भूमिका फेर्नु पर्ने बेला भएकाले प्रदेशको जिम्मेवारी छाडेर संघतर्फ अग्रसर भएको उनले बताए । ‘पद त्याग गर्दा दुःख लागेको छ,’ बनियाले भने, ‘देश बन्छ भने मेरो त्याग सानो हो । जेनजीको भावना र बालेनलाई प्रधानमन्त्री बनाउन रुपन्देहीको मर्चवारको पनि योगदान देखियोस् भनेर पद छाडेको हुँ ।’
तत्कालीन माओवादीबाट बाँके १ (१) बाट प्रदेश सांसद बनेकी बाँकेकी कृष्णा केसी (नमुना) पनि राजीनामा दिएर प्रगतिशील लोकतान्त्रिक पार्टीबाट उम्मेदवार बनेकी छन् । उनी अहिले क्षेत्र नम्बर १ बाट उम्मेदवार बनेकी छन् । प्रदेश सरकारमा रहेर मन्त्री समेत बनेकी उनले भूमिका संकुचित बनेकाले प्रतिनिधि सभामा उम्मेदवार बनेको बताइन् । संघीय संसद प्रवेश गरेर प्रदेश बलियो बनाउन आफूले पदबाट राजीनामा गरेको उनले बनाइन् । माओवादीबाट दाङ–२ (२) बाट निर्वाचित धनबहादुर मास्की अहिले नेकपाबाट संघीय उम्मेदवार बनेका छन् । उनी पनि प्रदेशमा आफ्नो भूमिकाप्रति सन्तुष्ट छैनन् । उनी दाङ–२ बाट उम्मेदवार बनेका हुन् ।
नागरिक उन्मुक्ति पार्टीबाट बर्दिया–२ (२) मा निर्वाचित धर्मबहादुर चौधरीले पद छाडेर उज्यालो नेपाल पार्टीबाट बर्दिया–२, मा उम्मेदवार बनेका छन् । ‘संघीयता नाम मात्रको भयो, सबै केन्द्रमै निर्भर भए,’ चौधरीले भने, ‘आफैं मन्त्री हुँदा समेत योजना र बजेट व्यवस्थापन गर्न नसक्दा वाचा पूरा गर्न अप्ठ्यारो भयो । जनताको माग सुनिश्चित गर्न प्रदेशसभाबाट राजिनामा दिएँ ।’ संघीयता लागू भए पनि प्रदेश अहिलेसम्म केन्द्रमा निर्भर रहेको बताए । अब नीति निर्माण तहमै बसेर संघीयता कार्यन्वयनमा बल पुर्याउन आफू प्रतिनिधि सभा सदस्यको उम्मेदवार बनेको बताए । ‘जनताको माग र अधिकार सुनिश्चित गर्न राजीनामा दिएँ,’ उनले भने ।
विश्लेषक मनिकर कार्कीले निश्चित पद र समयावधिका लागि निर्वाचित जनप्रतिनिधिले तोकिएको जिम्मेवारी र कार्य अवधि पूरा नगरि अर्को पदमा जान खोज्नु अनूचित भएको बताए । ‘यसले गत निर्वाचनमा जनतासामु पेश गरेका कार्ययोजना अलपत्र पर्छन्,’ उनले भने, ‘यसबाट जनताको मतको अवमूल्यन हुन्छ र राज्यको लगानी खेर जान्छ ।’ नेताहरुको यस्तो चरित्रले राजनीतिप्रति जनताको अविश्वास बढ्ने उनले बताए ।
प्रतिकृया दिनुहोस्