डेंगी संक्रमण नियन्त्रणका लागि सम्पूर्ण स्थानीय तहमा पत्राचार

Advertisement

भैरहवा–डेंगी संक्रमणको जोखिम बढ्दै जान थालेपछि स्वास्थ्य मन्त्रालयले मुलुकका ७५३ वटै स्थानीय तहलाई तीन महिनासम्म जनचेतना फैलाउनुका साथै लामखुट्टे ‘खोज र नष्ट गर’ अभियान सञ्चालन गर्न पत्राचार गरेको छ ।

Advertisement

यस बर्षपनि वर्षायाम सुरु भएसँगै देशभर डेंगी संक्रमणको जोखिम तीव्र रूपमा बढेको छ । स्वास्थ्य तथा खाद्य सुरक्षा मन्त्रालयका अनुसार, जनवरीयता १२ सयभन्दा बढी मानिस डेंगी संक्रमण भई उपचारका लागि अस्पताल पुगेका छन् । दुई जनाको मृत्यु भइसकेको छ । मृत्यु हुनेमा ७८ वर्षीय र ३९ वर्षीय दुई पुरुष छन् । गत वर्ष डेंगीका कारण ६ जनाको मृत्यु भएको थियो । करिब ९ हजार संक्रमित भएका थिए । सन् २०२५ मा हुम्लाबाहेक सबै हिमाली जिल्लामा डेंगी पुष्टि भएकोमा यो वर्ष पनि धेरै हिमाली भेगमा संक्रमण देखिइसकेको छ ।

इपिडिमियोलोजी तथा रोग नियन्त्रण महाशाखाका भेक्टर नियन्त्रण शाखाका प्रमुख डा.गोकर्ण दाहालले सबै स्थानीय तहलाई आगामी तीन महिनासम्म जनचेतनामुलक कार्यक्रम र ’लामखुट्टे खोज र नष्ट गर’ अभियान चलाउन पत्रचार गरिएको बताए । उनका अनुसार, रोकथामको मुख्य जिम्मेवारी प्रदेश र स्थानीय सरकारको भए पनि संघीय मन्त्रालयले बजेट तथा प्राविधिक सहयोग उपलब्ध गराउने गर्छ ।

सामान्यदेखि उच्च ज्वरो आउनु, मांसपेशीमा तीव्र दुखाइ हुनु, टाउको र आँखा दुख्नु तथा शरीरमा राता बिबिरा आउनु डेंगी संक्रमणको मुख्य लक्षण हुन् । प्हिलो पटक नेपालमा सन् २००४ मा चितवनमा एक विदेशी नागरिकमा डेंगी देखिएको थियो । सन् २०२२ मा ५४ हजारभन्दा बढी संक्रमित भएका थिए । ८८ जनाको मृत्यु भएको थियो ।सन् २०२३ मा देशका ७७ वटै जिल्लामा फैलिएर ५२ हजारभन्दा बढी संक्रमित र २० जनाको मृत्यु भएको थियो ।