ठूला नेताको नजर रूपन्देहीमा

भैरहवा– नेकपा एमाले, नेपाली काँग्रेस जनता समाजवादी पार्टी भन्दा पनि रुपन्देहीमा राजनीतिक धरातल कमजोर भएको नेकपा (माओवादी केन्द्र)ले गएको बिहीबार बुटवलमा प्रशिक्षण कार्यक्रम गर्यो । कमजोर क्षेत्रमा आफ्नो प्रभाव पार्ने माओवादीको उद्देश्य देखिन्छ ।

माओवादी अध्यक्ष एवं पूर्वप्रधानमन्त्री पुष्पकमल दाहाल प्रचण्ड, नेताहरु नारायणकाजी श्रेष्ठ, कृष्णबहादुर महरा, चक्रपाणि खनाललगायत उच्च तहका नेताले प्रशिक्षण कार्यक्रममा मन्तव्य राखेका थिए । अध्यक्ष प्रचण्डले नेताकार्यकर्तालाई प्रक्षिण दिँदै भनेका थिए, ‘माओावादीले आफ्नै बलबुतामा निर्वाचन जित्नुपर्छ । त्यही अनुसार तपाईंहरु लाग्नुस् ।’

Advertisement

तर, २०७४ को स्थानीय तह निर्वाचनमा रुपन्देहीमा माओवादीले जम्मा एउटा पालिका जितेको थियो । माओवादीबाट ओमसतिया गाउँपालिका अध्यक्षमा हिरा केवट निर्वाचित भएका थिए । केवट माओवादी छाडेर एमाले प्रवेश गरिसकेका छन् । यसले माओवादीको संगठन झनै कमजोर भएको छ । वास्तविक धरातलमा माओवादी २०७४ भन्दा कमजोर छ ।

जिल्लामा पछिल्ला दिनमा ठूला पार्टीका नेताहरुको ओहोरदोहोर चलिरहेको छ । पार्टी प्रवेशदेखि प्रशिक्षण कार्यक्रममा नेताहरु व्यस्त छन् । गृहमन्त्री बालकृष्ण खाँण त सरकारी र पार्टीका कामका लागि चैत लागेपछि तीन पटक रुपन्देही आइसकेका छन् । रुपन्देही क्षेत्र नम्बर तीनबाट प्रतिनिधि सभामा निर्वाचन लड्ने तयारी गरेका खाँणले आफ्नो क्षेत्रमा विशेष चासो दिएको देखिन्छ । क्षेत्रको र त्यसमा पनि अली दिग्गज वर्गको उपस्थिति हुने कार्यक्रममा उनी धाइरहेका छन् ।

पछिल्ला दिनमा उनको जिल्लामा आउजाउ बाक्लो छ । उनले काँग्रेसले नै संविधान र लोकतन्त्रको रक्षा गर्ने तथा जनभावनाअनुसार काम गर्ने बताउँदै आएका छन् । एमाले उपाध्याक्ष विष्णुप्रसाद पौडेल, उपमहासचिव प्रदीपकुमार ज्ञवाली, सचिव छविलाल विश्वकर्मा र नेता घनश्याम भुसालले पनि रुपन्देही आउजाउलाई बाक्लो बनाएका छन् ।

सरकारले आगामी २०७९ बैशाख ३० मा स्थानीय तह निर्वाचन घोषणा गरिसकेको छ । निर्वाचन मिति नजिकिँदै जाँदा नेताहरुको जिल्लामा उठबस बाक्लो छ । कार्यकर्ता तान्ने होडमा नेताहरु देखिन्छन् । अघिल्लो हप्ता बुटवलमा आयोजित कार्यक्रममा एमाले उपाध्याक्ष पौडेलले भनेका थिए, ‘एमालेलाई हराउने कसैको ताकत छैन । आगामी निर्वाचनमा दुई तिहाई स्थानीय तह एमालेले जित्छ, त्यसपछि प्रदेश र संघको निर्वाचन पनि जितेर तीन तहमा एमालेले सरकार बनाउँछ ।’

जिल्लामा काँग्रेस एमालेको संगठन बलियो छ । धेरै स्थानीय तह यी दुई पार्टीले जित्ने देखिन्छ । जसले गर्दा पनि नेताहरुको ध्यान यहाँ बढी छ । यसअघि प्रतिनिधि सभामा रुपन्देहीबाट एमालेका तीन जना निर्वाचित भएका थिए । क्षेत्र नम्बर एकबाट छविलाल विश्वकर्मा, दुईबाट विष्णु पौडेल र तीनबाट घनश्याम भुसाल । काँग्रेसबाट क्षेत्र नम्बर चारमा प्रमोदकुमार यादव र पाँचबाट भरतकुमार शाह निर्वाचित भएका थिए ।

प्रदेश सभामा ५ जना एमालेबाट निर्वाचित भएका थिए भने काँग्रेसबाट ३ जना निर्वाचित भएका थिए । माओवादीबाट एक र तत्कालीन संघीय समाजवादीबाट एक जना निर्वाचित भएका थिए । माओवादीबाट निर्वाचित दधिराम न्यौपाने एमाले प्रवेश गरेका छन् भने पार्टी एकीकरण पछि बनेको जसपाका सांसद सन्तोष पाण्डेय पनि पार्टीबाट निस्कासित भएका छन् । रुपन्देहीमा प्रदेश सभामा दुई पद रिक्त छ ।

२०७४ को स्थानीय तह निर्वाचनमा बुटवल उपमहानगरपालिका, तिलोत्तमा, सिद्धार्थनगर र सैनामैना नगरपालिका तथा सियारी, कंचन र शुद्धोधन गाउँपालिका एमालेले जितेको थियो । यस्तै, काँग्रेसले मायादेवी र देवदह नगरपालिकामा जित हात पारेको थियो । तत्कालीन संघी समाजवादी हाल जसपाले कोटहीमाई, गैडहवा, रोहिणी र मर्चवारी गाउँपालिकामा जित निकालेको थियो ।

लुम्बिनी सांस्कृतिक नगरपालिकामा स्वतन्त्र उम्मेदवार मनमोहन चौधरीले जितेका थिए भने ओमसतिया गाउँपालिका माओवादीका हिरा केवटले जितेका थिए । यस्तै, सम्मरीमाई गाउँपालिका अध्यक्षमा तत्कालीन मधेशी जनअधिकार फोरमबाट बब्लु शुक्ला निर्वाचित भएका थिए ।

अहिले अवस्था फेरिएको छ । स्वतन्त्र निर्वाचित लुम्बिनीका प्रमुख चौधरी जसपा प्रवेश गरेका छन् भने माओवादीबाटा निर्वाचित ओमसतिया अध्यक्ष केवट र जसपाबाट निर्वाचित रोहिणी अध्यक्ष सनोजकुमार यादव एमाले प्रवेश गरेका छन् । यस्तै, जसपा विभाजनपछि मर्चवारीका अध्यक्ष केशवनन्द बनियाँ लोसपातिर लागेका छन् । सम्मरीमाईका अध्यक्ष शुक्ल एमाले हुँदै माओवादी प्रवेश गरेका छन् ।

स्थानीय तहको निर्वाचन मिति नजिकिँदै गर्दा रुपन्देहीमा ठुला दलका केन्द्रीय नेताहरूको ओहोरदोहोर बढेको छ । कार्यकर्ता प्रशिक्षण, पार्टी प्रवेश कार्यक्रमदेखि शिलान्यास, उद्घाटन जस्ता चुनाव लक्षित गतिविधिलाई दलहरूले तीव्रता दिएका छन् । नेपाली काँग्रेस, नेकपा एमाले, नेकपा माओवादी केन्द्रका नेताहरू पछिल्लो समय रुपन्देहीमा आउने होड नै चलेको छ ।

रुपन्देही काँग्रेस नेता तथा गृहमन्त्री बालकृष्ण खाँण र नेकपा एमालेका उपाध्यक्ष विष्णु पौडेल, एमालेकै नतोहरु घनश्याम भुसाल, एमाले सचिव छविलाल विश्वकर्मा र राप्रपा नेता दीपक बोहरा तथा लोसपा नेता शर्वेन्द्रनाथ शुक्लाको गृह जिल्ला हो ।

पछिल्लो साता गृहमन्त्री खाँणका अतिरिक्त काँग्रेस नेताहरू मीन विश्वकर्मा, पूर्व अर्थ राज्यमन्त्री उदयशम्शेर राणा रुपन्देही आएका थिए । दलहरूले चुनावी माहौल तयार पार्न ठाउँ ठाउँमा पार्टी सम्पर्क कार्यालय खोल्नेदेखि अर्को दलका कार्यकर्तालाई आफ्नो पार्टीमा प्रवेश गराउने काम गरेका छन् । यस क्रममा जनप्रतिनिधिहरूदेखि सामान्य कार्यकर्ता खोसाखोसमा परेका छन् ।

जनमत पार्टीदेखि राप्रपा, एमाले, माओवादी, नेपाली काँग्रेसले यहाँ नयाँ कार्यकर्ता भित्र्याउन कार्यक्रम आयोजना गर्ने गरेको देखिन्छ । दलहरुले घरदैलोसमेत सुरु गरेका छन् । टिकट पाउने सम्भावित नेताहरु पनि घरघर पुग्ने र जनगुनासो सुन्न थालेका छन् । गाउँ टोलमा कार्यक्रम गरेर ठूलो नेता बोलाउने र जनतालाई आश्वासन बाँड्न सुरु भएको छ ।