प्रहरीको घुमुवा भन्दै पैसा उठाउने पक्राउ

Advertisement

भैरहवा–आफूलाई सादा पोशाकको प्रहरी (घुमुवा) बताउँदैं पैसा उठाउन संलग्न रहेको आरोपमा एक जना पक्राउ परेका छन् । घुमुवा प्रहरी भन्दै नक्कली रिभल्वर देखाएर सर्वसाधारणसित रकम मागेको आरोपमा रुपन्देहीको सिद्धार्थनगर नगरपालिका–१३, शान्तिनगरबाट एक जनालाई पक्राउ गरिएको जिल्ला प्रहरीले जनाएको छ ।

Advertisement

प्रहरीका अनुसार शुक्रबार साँझ पक्राउ पर्नेमा सिद्धार्थनगर नगरपालिका–,१३ घर भई अहिले ओमसतिया–४, बालापुरमा कोठा भाडामा लिएर बसिरहेका ४९ वर्षीय राकेश प्रताप राणा रहेका छन् । साउन ८ गते साँझ साढे ७ बजे भैरहवा बजार क्षेत्रमा राणाले आफू जिल्ला प्रहरी कार्यालयकोे घुमुवा हुँ भन्दै पेस्तोल देखाएर सर्वसाधारणसँग १० हजार रुपैयाँ मागिरहेको सूचनाका आधारमा उनलाई पक्राउ गरिएको थियो ।

सूचना प्राप्त भएपछि जिल्ला प्रहरी कार्यालय रुपन्देहीबाट प्रहरी निरीक्षकको कमाण्डमा टोली परिचालन गरिएको थियो । उनको शरीर तथा डेरा कोठा खानतलासी गर्दा लुकाइछिपाइ राखिएको नक्कली रिभल्वर एक थान, सवारी चालक अनुमतिपत्र एक थान, लागू औषध गाँजा ५ सय ग्राम, भिभो कम्पनीको एन्ड्रोइड मोबाइल एक थान तथा नेपाली नगद २ हजार ६ सय बरामद गरि बरामद गरिएको प्रहरीले जनाएको छ ।

बरामद सामग्री जिल्ला प्रहरीमा राखेर घटनाबारे थप अनुसन्धान भइरहेको प्रहरी नायव उपरीक्षक कृष्ण कुमार चन्दले बताए ।