डुबेर पाल्पामा दुई किशोरकाे मृत्यु, बर्दियामा एक बेपत्ता

पब्लिक कुरा
२०८३ असार ६

1810 Share

भैरहवा–दुई दिन अघि कालिगण्डकीमा डुबेका पाल्पाका दुईजना किशोर मृत अवस्थामा फेला परेका छन् भने बर्दियामा एकजना किशोर डुबेर बेपत्ता भएका छन् ।

कालीगण्डकी नदीमा पौडी खेल्ने क्रममा बिहीबार बेलुकी पाल्पाको बगनासकाली गाउँपालिका–६ शिखरडाँडा घरभएका दुईजना किशोर डुबेर बेपत्ता भएका थिए । स्थानीय २४ वर्षीय पुजन गाहा र १४ वर्षीय शिशिर गाहा नामका किशोर मृत अवस्थामा फेला परेका हुन् ।

प्रहरी, सशस्त्र प्रहरी र स्थानीयको सहयोगमा खोजी गर्ने क्रममा कालीगण्डकीकै शुक्रबार शव फेला परेको जिल्ला प्रहरी कार्यालय पाल्पाका सूचना अधिकारी डीएसपी भीमलाल भट्टराईले बताए । बगनासकाली–७ दैलातुङमा यसअघि नयाँ वर्ष मनाउन गएका दुई युवाकोसमेत डुबेर मृत्यु भएको थियो ।

बर्दियाको गेरुवा गाउँपालिका वडा नं १ जनकनगरमा कर्णाली नदीमा अस्थायी बाँध बाध्न गएका एक जना डुबेर बेपत्ता भएका छन् । नहरमा पानी ल्याउन बाँध बाध्न गएका राजापुर नगरपालिका वडा नं. ४ शान्तीपुरका १६ वर्षीय नारायण चौधरी पानीमा डुबेर बेपत्ता भएका हुन् ।

उनको खोजीको लागि स्थानीयवासी नेपाल प्रहरी, सशस्त्र प्रहरी, नेपाली सेना लगायतको उद्धार टोलीको परिचालन भएको इलाका प्रहरी कार्यालय पाताभारका प्रहरी निरिक्षक भुपेन्द्र बुढाथोकीले बताएका छन् । कर्णाली नदीमा बर्षेनी अस्थायी बाँध बाध्नका लागि किसानहरू जोखिमपुर्ण रुपमा जाने गर्दछन् ।