विदेश जाने सोच त्यागेर भैरहवामा क्याफे

Advertisement

भैरहवा– रुपन्देहीको देवदहका २३ वर्षीय अनिस सुनारले भैरहवाको बसपार्कमा माछापुच्छ्रे थकाली एण्ड क्याफे सञ्चालन गरिरहेका छन् । पाँच वर्षदेखि होटल व्यवसायमा सक्रिय छन् । केही समय विभिन्न होटल र रेष्टुराँमा काम गरेका उनको सानै उमेरदेखि आफ्नै लगानीमा व्यवसाय गर्ने धोको थियो । एकातिर कामलाई अगाडि बढाइरहेका उनले पढाइलाई पनि निरन्तरता दिँदै कक्षा १२ सम्म अध्ययन पूरा गरेका छन् ।

Advertisement

परिवारमा आमा दुर्गा र दाइ छन् । उनलाई भने सानीआमा अमृता बिक बस्यालले पालनपोषण गरिन् । ‘आमाले जन्म र सानीआमाले कर्म दिनु भयो,’ उनले भने । सानी आमा अमृता पनि लामो समयदेखि होटल व्यवसायमा संलग्न छन् । दुई दशकदेखि उनले भैरहवामा ‘सुपर पोट व्यालक रिसोर्ट एण्ड लज’ सञ्चालन गर्दै आएकी छन् ।

सानी आमासँगै उनले होटल व्यवसाय बुझ्ने अवसर पाएको बताए । सुरुमा मुलुकमै केही गर्ने सोच थिएन । त्यसैले कक्षा १२ पूरा गरेपछि विदेश जाने सोच बनाएका थिए । देशको राजनीतिक अवस्था, बेरोजगारी र आर्थिक समस्याले उनलाई पनि निराश बनाएको थियो । ‘तर केही समय सानी आमाको लजमा काम गर्दै अनुभव बटुलेपछि आफ्नै व्यवसाय सुरु गर्ने निर्णय गरेँ,’ उनले भने ।

जेनजी आन्दोलनपछि मुलुकको राजनीतिमा ठूलो परिवर्तन आएको र अहिले स्थिर सरकार बनेको उनले बताए । ‘यो सरकारले काम गरेर देखायो भने मुलुकमै बसेर व्यवसाय गर्ने सोच छ,’ उनले भने, ‘तर आर्थिक अवस्था यस्तै कमजोर भइरह्यो र सरकारले व्यवसायमैत्री वातावरण बनाउन नसकेमा विदेश जाने विकल्प खुला रहेको छ ।’ अहिले भाडामा जग्गा लिएर होटल सञ्चालन गरिरहेका छन् । मासिक ३५ हजार रुपैयाँ घरभाडा तिर्ने गरेका छन् । कुक र वेटर गरी पाँच जनालाई रोजगारी दिएका छन् । कर्मचारीको तलब, विद्युत् र अन्य खर्च जोड्दा मासिक १ लाख २५ हजार रुपैयाँ खर्च हुने गरेको उनले बताए ।

होटलमा दैनिक एक सय भन्दा बढी ग्राहक आउने गरेका छन् । कारोबार पनि दिनअनुसार फरक हुने गरेको उनको भनाई छ । कहिले दिनमा १५ त कहिले ५० हजार रुपैयाँसम्म कारोबार हुने गरेको सुनार बताउँछन् । ‘कहिलेकाहीँ पाँच हजार रुपैयाँ पनि बिक्री हुँदैन,’ उनले भने, ‘तर नसोचेको राम्रो व्यापार हुन्छ, व्यापारमा सबैभन्दा ठूलो कुरा धैर्यता रहेछ ।’ क्याफेमा थकाली खाना विशेष परिकारको रूपमा लोकप्रिय छ ।

यहाँ सादा खाना २ सय ५० रुपैयाँ, चिकेन खाना ३५० रुपैयाँ र मटन खाना ४ सय रुपैयाँमा उपलब्ध छ । मोमो, चाउमिन, स्यान्डविच लगायत विभिन्न नास्ताका परिकार रहेको उनले बताए । होटलमा आटो, फापरको ढिँडो, माछा तथा मार्सी चामलको स्वाद लिन सकिने व्यवस्था रहेको सुनार बताउँछन् ।

भैरहवाको बसपार्क भारतसँगको सीमानाकाको नजिक भएकाले भारतीय ग्राहकको चहलपहल पनि उल्लेख्य हुने गरेको सुनार बताउँछन् । नेपाली स्वादसँगै थकाली खानाको विशेषताले विदेशी ग्राहकसमेत आकर्षित हुने गरेका छन् ।