मुलुकलाई कुशल नेतृत्व चाहिएका बेला मत खेर नफाल्नुस्ः कांग्रेस उम्मेदवार गुरुङ

पब्लिक कुरा
२०८२ माघ २८

972 Share

भैरहवा – मुलुकमा केही भएन ? मुलुकमै बसेर केही हुने वाला छैन ? मुलुक त सिध्याएँ । आजकाल समाजमा यस्तै भनाई सुनिन्छन् । आम जनसमुदाय निराश छन् । यस्तो बेला मुलुक हाँक्न कुशल नेतृत्व चाहिएको रुपन्देही–३, का नेपाली कांग्रेस उम्मेदवार सुशील गुरुङले बताएका छन् ।

अहिलेसम्म मुलुक हाँक्ने चालक गतिलो नहुँदा जनताका अपेक्षा पूरा हुन नसकेको उनले बताए । ‘जसरी कुशल चालकले गाडीलाई गन्तव्यमा पुर्याउँछन्, त्यसैगरि मुलुकलाई पनि समृद्धिको गन्तव्यमा पुर्याउन कुशल चालक चाहिएको छ,’ उनले भने, ‘त्यसैले यसपटक मत खेर नहाल्न मेरो अनुरोध छ ।’

हरेक कालखण्डमा नेपाली कांग्रेसले मुलुकलाई सही दिशामा डोर्याएको उल्लेख गर्दै यसपटक पनि आफ्नो दल बदलिएर जनता समक्ष आएको बताए । पार्टीको विशेष महाधिवेशनबाट नयाँ सभापति चयन गरेर नयाँ कार्यदिशा सहित कांग्रेस चुनावमा होमिएको उनले जनाए । कांग्रेसले सभापति गगनकुमार थापालाई प्रधानमन्त्रीको उम्मेदवार तोकिसकेकाले यसपटक आफूलाई मतदान गर्न अनुरोध गरे ।

‘गगन थापा मुलुक बनाउने दृष्टिकोण भएका नेता हुनुहुन्छ,’ उनले भने, ‘उहाँलाई प्रधानमन्त्री बनाउन यसपटक मतदाताले प्रत्येक्ष र समानुपातिक दुबैतर्फ रुख चिन्हमा मतदान गर्नुपर्नेछ ।’

यस अघि प्रधानमन्त्री भइसकेका व्यक्ति प्ररीक्षण भएका पात्र हुन् । ‘नयाँ दलका नेतासित मुलुक कता पुर्याउने भन्ने ‘रोडम्याप’ नै छैन । त्यसैले ‘भिजन’ र ‘मिसन’ भएका नेता गगन कुमार थापालाई प्रधानमन्त्री बनाउने अवसर नगुमाउन मेरो आग्रह’, उनले मतदातालाई अनुरोध गर्दै भने । सामाजिक संघसंस्थाको नेतृत्व गर्दै आएका गुरुङ यसपटक रुपन्देही–३, बाट उम्मेदवार बनेका हुन् ।

आफू युवा उमेरमा हुँदा साथिभाईले बिदेश जान सल्लाह दिएको स्मरण गर्दै उनले भने, ‘जस्तो सुकै दुःख सहेर पनि नेपाली समाजको बिकासका लागि काम गर्नुपर्छ भनेर बिदेश नजाने निर्णय गरेँ । विद्यालय, क्याम्पस जीवनबाट राजनीतिलाई समाज सेवाका रुपमा अगाडि बढाएँ ।’

राजनीतिलाई विशुद्ध सेवाका रुपमा अँगालेका कारण यसपटक रुपन्देही–३, का जनताले संसदमा पुगेर जनपक्षीय कानुन निर्माणका लागि अवसर दिनुपर्ने उनले बताए । अर्कातर्फ सभापति गगन थापालाई प्रधानमन्त्री बनाउनकै लागि पनि आफूले चुनाव जित्न जरुरी रहेको उनले बताए । ‘सधैं सेवकका रुपमा जनता माझ उपस्थित भइरहेको छु,’ उनले भने, ‘चुनाव जितेर गएपछि पनि सेवककै रुपमा तपाईंहरु माझ हाजीर भइरहने प्रतिवद्धता व्यक्त गर्छु ।’