ह्याट्रिक गर्दै लेवान्डोस्कीले बनाए नयाँ कीर्तिमान

रोबर्ट लेवान्डोस्कीको ह्याट्रिकको मद्दतले साबिक विजेता बायर्न म्युनिखले हेर्था बर्लिनमाथि ५–० को शानदार जीत हासिल गर्न सफल भएको छ । योसँगै पोलिस स्ट्राइकरले बायर्नका ३ सय गोल पुरा गरेका छन् । लेवान्डोस्की बोरुसिया डर्टमण्डबाट सन् २०१४ मा बायर्नसँग अनुबन्ध भएका हुन् ।

यता, लेवान्डोस्कीले बायर्नका लागि लगातार १६ खेलमा गोल गर्दै गर्ड मुलरले सन् १९७० मा बनाएको कीर्तिमान पनि भङ्ग गरे । गत अगस्तमा १५ निधन भएका मुलरले १५ वर्ष बायर्नमा रहँदा ५९४ खेलमा ५४७ गोल गरेका थिए । त्यस्तै, ३३ वर्षीय लेवान्डोस्कीले बुन्डेस लिगामा लगातार १३ खेलमा गोल गर्न सफल भएका छन् ।  

खेलमा अन्य गोल थोमस मुलर र जमाल मुस्लालाले गरे । मुलरले लिगमा लगातार १३ सिजन गोल गर्न सफल भएका छन् । जीतसँगै बार्यन गोलअन्तरको आधारमा लिगको दोस्रो स्थानमा उक्लिएको छ । शीर्ष स्थानमा रहेको बायर लेभरक्युजनले एफसी अग्सबर्गलाई ४–१ ले हरायो ।

Advertisement