युवतीलाई खुकुरी देखाउँदै कुटपिट गर्ने युवक लागूऔषधसहित पक्राउ

पब्लिक कुरा
२०८३ असार ३

1330 Share

दाङ– प्रहरीले एक युवतीलाई खुकुरी देखाउँदै कुटपिट गरेको भाइरल भिडियोमा देखिएका युवकलाई पक्राउ गरेको छ । पक्राउ पर्नेमा दाङको तुलसीपुर उपमहानगरपालिका–२, भमके निवासी अन्दाजी २४ वर्षीय रमेश ठाडामगर रहेको इलाका प्रहरी कार्यालय तुलसीपुरले जनाएको छ ।

उनलाई मंगलबार राति उनकै घरबाट पक्राउ गरिएको हो । प्रहरीका अनुसार उक्त भिडियो रमेशकै घर नजिक गत चैत महिनामा रातिको समयमा खिचेर फेसबुकमा पोष्ट गरेको खुलेको छ । सो भिडियोमा रमेशले तुलसीपुरकै २१ वर्षीया एक युवतीलाई अश्लील शब्दसहित गालीगलौज गर्दै खुकुरीको उल्टोतिरको भागले प्रहार गरेको देखिन्छ । प्रहरीका अनुसार ती युवतीको स्वास्थ्य अवस्था सामान्य छ ।

घटनामा संलग्न रहेको आरोपमा अर्का २१ वर्षीय जिबराज खत्रीलाई समेत नियन्त्रणमा लिई थप अनुसन्धान भइरहेको प्रहरीले जनाएको छ । पक्राउ परेका रमेशको साथबाट झण्डै ५० ट्याब्लेट लागुऔषधसमेत बरामद भएको जिल्ला प्रहरी कार्यालय दाङले जनाएको छ। प्रहरीका अनुसार प्रेगाम्याक्स, एक ट्याब्लेट, ट्रोमो ४१ ट्याब्लेट, एन्टिकोप २ ट्याब्लेट र नाइट्राजोम ५ ट्याब्लेट बरामद भएको छ ।