रूपन्देही उद्योग संघमा बेकरी वस्तुगत समिति गठन

Advertisement

बुटवल– रुपन्देही उद्योग संघमा बेकरी वस्तुगत समिति गठन गरिएको छ । संघमा आबद्ध बेकरी उद्योगीहरूको भेलाबाट सूर्य बेकरीज उद्योगका सञ्चालक सूर्य बहादुर भुजेलको संयोजकत्वमा ७ सदस्यीय वस्तुगत समिति गठन गरिएको हो ।

Advertisement

संघका प्रथम उपाध्यक्ष एवं कार्यक्रम संयोजक हरिबहादुर खत्रीको अध्यक्षता तथा संघका अध्यक्ष कृष्णप्रसाद पराजुलीको प्रमुख आतिथ्यतामा सम्पन्न कार्यक्रममा संघका पूर्व अध्यक्ष, पदाधिकारी, कार्यसमिति सदस्य तथा बेकरी उद्योगीहरूको उल्लेखनीय उपस्थिति थियो ।

गठित समितिको सह–संयोजकमा तुलसी पाउरोटी उद्योगका ललित तिवारी, सचिवमा सवाना बेकरीज उद्योगका मो.आजाद चयन भएका छन् । त्यसैगरी सदस्यहरूमा राकेस फुड प्रोडक्ट्स उद्योगका राजेन्द्रकुमार उपाध्याय, सगरमाथा बेकरीज उद्योगका जयनाथ बस्नेत, गैरे बेकरीज उद्योगका पिताम्बर गैरे तथा श्रीजय गणेश पाउरोटी उद्योगका महेन्द्रकुमार गुप्ता छन् ।

भेलाले समितिका सल्लाहकारहरूमा संघका प्रथम उपाध्यक्ष हरिबहादुर खत्री, कार्यसमिति सदस्य यादव गैरे, लुम्बिनी बेकरीज व्यवसायी संघका अध्यक्ष देवानन्द पाण्डे, अन्जना बेकरीज उद्योगका विनोदप्रसाद चौधरी तथा बुद्ध बेकरीज उद्योगका हिमांशुराज शाक्यलाई चयन गरेको छ ।

कार्यक्रममा संघका अध्यक्ष पराजुलीले नवगठित समितिलाई बधाई तथा शुभकामना व्यक्त गर्दै उद्योगीका साझा समस्याहरूलाई संघसम्म ल्याई समाधानका लागि सामूहिक पहल गर्न आग्रह गरे । समितिको सक्रियताबाट औद्योगिक विकासमा महत्वपूर्ण योगदान पुग्ने विश्वास व्यक्त गर्दै उनले उद्योगीहरूलाई एकताबद्ध भएर अघि बढ्न आग्रह गरे ।

नवगठित समितिका संयोजक सूर्यबहादुर भुजेलले आफ्नो क्षेत्रबाट औद्योगिक विकासमा हातेमालो गर्दै सक्रियतापूर्वक काम गर्ने प्रतिबद्धता व्यक्त गरे । त्यस अवसरमा संघका पूर्व अध्यक्ष बाबुराम बोहराले नवगठित समितिलाई सफल कार्यकालको शुभकामना व्यक्त गरे । सोही अवसरमा लुम्बिनी बेकरीज व्यवसायीसंघका अध्यक्ष देवानन्द पाण्डेले उद्योग व्यवसायमा देखिएका समस्याहरूलाई संघमार्फत समाधान गर्नुपर्नेमा जोड दिँदै हरेक कार्यक्रममा सक्रिय सहभागिताका लागि आग्रह गरे ।

सो अवसरमा कार्यक्रम संयोजक तथा प्रथम उपाध्यक्ष हरि बहादुर खत्रीले वस्तुगत समिति गठनको उद्देश्यबारे प्रकाश पारेका थिए भने संघका महिला सचिव मञ्जु भुसालले कार्यक्रम सञ्चालन गरेकी थिइन् । कार्यक्रममा संघका कोषाध्यक्ष विशाल बेलबासेले धन्यवाद ज्ञापन गरेका थिए ।