लुम्बिनी प्रदेशमा मुख्यमन्त्री फेर्न कसरत, पालो कुर्दै कांग्रेस

Advertisement

भैरहवा– लुम्बिनी प्रदेशका पूर्वमुख्यमन्त्री तथा कांग्रेस संसदीय दलका नेता डिल्लीबहादुर चौधरीले केही महिना अघि गत चैत ८ गतेभित्र सरकार परिवर्तन भइसक्ने बताएका थिए । त्यसका लागि वर्तमान मुख्यमन्त्री चेतनारायण आचार्यसित छलफल भइरहेको उनको दावी थियो । उनले भनेजस्तो परिस्थिति रहेन ।

Advertisement

कांग्रेसमा विशेष महाधिवेशनबाट नेतृत्व परिवर्तन गरियो । कांग्रेस सभापतिमा गगन थापा चुनिए । लगत्तैं प्रतिनिधिसभा सदस्य निर्वाचन आयो । जसले गर्दा सरकार परिवर्तनको विषय ओझेलमा पर्यो । अर्कोतर्फ कांग्रेसभित्र पहिलको संस्थापन पक्ष किनारा लाग्यो । नयाँ पक्ष संस्थापन बनेको छ । एमालेभित्र पनि भविष्यमा कसरी अगाडि बढ्ने भन्नेबारे घनिभूत छलफल भएन । जसले गर्दा प्रदेश सरकार परिवर्तनमा ढिलाई भइरहेको छ ।

ढिलैं भए पनि लुम्बिनी प्रदेशमा सत्तारुढ एमालेभित्र सरकार फेर्ने कसरत अघि बढेको छ । एमाले अध्यक्ष केपी शर्मा ओलीले आफ्नै मुख्यमन्त्री फेर्ने प्रयास सुरु गरेको नेताले दाबी गरेका छन् । स्रोतका अनुसार काठमाडौंमा आइतबार यस विषयमा छलफल भएको हो । निष्कर्षमा पुग्न नसकेपछि सोमबार सचिवालय बैठकमा प्रदेश सरकारको नेतृत्व र मन्त्री फेरिन सक्ने विषयमा छलफल भएको थियो । बैठकमा अध्यक्ष ओलीले सातै प्रदेश सरकारको नेतृत्व परिवर्तनको विषयमा कांग्रेस र नेकपासँग अनौपचारिक छलफल भइरहेको जानकारी सचिवालय बैठकमा गराएको एक नेताले बताए । ओलीले मंगलबार पनि प्रदेश सरकार फेरबदलको विषयमा कांग्रेससँग छलफलको प्रयास गरेका थिए । कांग्रेसले बुधबार गर्ने भनेपछि छलफल अगाडि बढ्न सकेन ।

लुम्बिनी प्रदेशमा अहिले एमालेका आचार्य मुख्यमन्त्री छन् । एमाले महासचिव शंकर पोखरेल निकट मानिन्छन् । त्यसकै कारण पनि ओलीले फेर्ने प्रयासमा रहेको एमालेका केन्द्रीय नेताहरूको दाबी छ । लुम्बिनीमा कांग्रेससँग १८ महिना आचार्यले सरकारको नेतृत्व गर्ने र त्यसपछिको १८ महिना कांग्रेसले नेतृत्व गर्ने सहमतिअनुसार २०८१ साउनमा आचार्य मुख्यमन्त्री भएका थिए । उक्त सहमति अनुसार गत फागुनमै त्यो समयसीमा सकिएको छ ।

अहिले लुम्बिनी कांग्रेसभित्र पनि संस्थापन र इतरपक्षबीच मुख्यमन्त्रीका लागि प्रतिस्पर्धा चलिरहेकाले कांग्रेसले प्रदेश सरकारले बजेट ल्याएपछि मात्र सरकारको नेतृत्व फेर्ने तयारी छ । तर, एमालेमा त्यो भन्दा अघि नै मुख्यमन्त्री फेर्ने गरी प्रयास भइरहेको हो । कांग्रेसका नेताहरू भने आवश्यक नै परे मन्त्रीहरू हेरफेर गर्ने तर सरकारको नेतृत्व बजेटपछि मात्र फेर्ने गरी छलफल गरिरहेका छन् ।

एमाले नेताहरूका अनुसार अहिले केपी शर्मा ओलीले कोशी र लुम्बिनीमा नेतृत्व फेर्ने प्रयास गरिरहेका छन् । त्यसका लागि ओलीले कांग्रेस र नेकपा संयोजक पुष्पकमल दाहालसँग पनि छलफल गरिरहेका छन् । त्यसकै आधारमा नेकपाका नेता एवं लुम्बिनीका पूर्वमुख्यमन्त्री जोखबहादुर महरालाई केन्द्रमा भएको छलफलको जानकारी गराएका हुन् । नेकपाका लुम्बिनी प्रदेश संयोजक सुदर्शन बरालले सामान्य छलफल चलिरहेको तर ठोस केही नभएको बताए । ‘दलको नेतासँग सामान्य कुराकानी भइरहेको जानकारी छ,’ उनले भने, ‘निष्कर्षमा पुग्ने गरी ठोस छलफल अझै भएको छैन । एक–दुई दिनमा केही होला ।’

लुम्बिनी प्रदेशबाट एमालेको केन्द्रीय सदस्यमा निर्वाचित एक नेताका अनुसार लुम्बिनीमा कांग्रेस नेतृत्व लिन तयार नभए नेकपासँग सहकार्य गर्ने गरी ओलीले छलफल गरिरहेका छन् । ‘पहिलो सम्झौता अनुसार कांग्रेसलाई नेतृत्व लिन आग्रह गर्ने, दोस्रो नेकपासँग छलफल गर्ने र त्यो पनि नभए एमालेकै अर्को व्यक्ति अघि सार्ने तयारीमा अध्यक्षज्यूको मनसाय देखिन्छ,’ ती केन्द्रीय सदस्य भन्छन्, ‘नेतृत्व फेर्ने भन्दै उपाध्यक्ष विष्णु पौडेल र महासचिव शंकर पोखरेल अघि बढेपछि चिढिएका ओली कमरेडले अर्को विकल्प प्रयोग गर्न खोजेको बुझिन्छ ।’

ओलीले कोशी र लुम्बिनी सरकारको एमाले नेतृत्व तत्काल परिवर्तन गर्न खोजेको देखिएको ती सदस्यले बताए । एमाले महासचिव शंकर पोखरेल मंगलबार गृहजिल्ला दाङ आएका छन् । उनले मंगलबार देउखुरीमा प्रदेश सरकारका नयाँ भवनहरूको अवलोकन गर्ने, एमालेका प्रदेश मन्त्रीहरू र कर्मचारीसँग पनि छलफल गरेका थिए । महासचिव पोखरेलले जनताको मन छुने गरी बजेट बनाउन निर्देशन दिएको भौतिक पूर्वाधार विकास मन्त्री भूमिश्वर ढकालले बताए ।