नक्कली छोरी बनेर घरजग्गा हडप्ने प्रयास : कतैबाट न्याय नमिलेपछि निराश मल्लाह दाजुभाई

पब्लिक कुरा
२०८२ मंसिर १६

479 Share

भैरहवा– सरकारी अड्डा अदालतबाट न्याय नपाएपछि रुपन्देहीको सिद्धार्थनगर नगरपालिका–६, का सन्त र लालजीत मल्लाह निराश छन् । प्रमाण जुटाउँदा जुटाउँदै समय घर्केपछि राज्यप्रति उनीहरुको विश्वास टुटेको छ । खुट्टामा चप्पल, काँधमा झोला बोकेर सरकारी अड्डा पुग्ने उनीहरुलाई कर्मचारीले टेर्दैनन् । नागरिकका रुपमा कार्यालय पुग्दा सुनुवाई नहुने भएपछि दाजुभाई टाउकोमा हात लगाएर बस्न बाध्य छन् । राज्यका निकायप्रति भरोसा टुटेको सुनाउँछन् ।

दाजु–भाईलाई पुख्र्यौली सम्पत्ति प्राप्त गर्न कानुनी अड्चन छैन । सम्पति नाउँमा आउनेमा दुबैं ढुक्क थिए । अचानक काका सुखु मल्लाहको छोरी भएको दावी गर्दै दुई भारतीय महिला देखापरे । परिवारको दावी अनुसार सुखु निःशन्तान थिए । सुखुको शेषपछि अदालतको पैसलाबाट सुखुको सम्पत्ति उनका दाई फौदारका छोराहरु लालजीत र सन्तको नाममा गइसकेको छ । यसैबीच सरकारी कर्मचारी र जनप्रतिनिधिको मिलेमतोमा भारतीय नागरिक बदल मल्लाहका छोरीहरु मालती र रिखिदेवी मल्लाहले सम्पत्ती हत्याउन खोजेको दावी लालजीत दाजुभाईको छ । मालती र रिखदेवी आफ्नो दिदि–बहिनी नभएको प्रमाण सन्त र लालजतीले जिल्ला प्रशासन र अदालतमा बुझाइसकेका छन् । मालती र रिखिदेवी आफ्नो वंशको भए–नभएको प्रमाणित गर्नका लागि डीएनए परीक्षणको माग गरिरहेका छन् । तर, सुनुवाई भएको छैन ।

दैनिक अड्डा अदालत धाउन थालेको ५ वर्ष भयो । झुठो विवरण पेश गरेर सम्पत्ति कब्जा हुन लाग्यो भनेर दाजुभाईले गुहार मागिरहेका छन् । ‘२०७७ सालमा बुवाको मृत्यु भयो,’ सन्तले भने, ‘त्यही बेलादेखि हामी सम्पत्ति जोगाउन माग गर्दै धाइरहेका छौं ।’ अहिले दाजुभाई अटो रिक्सा चलाएर घर खर्च धानिरहेका छन् । एक समय बडी विल्डर रहेका सन्तको स्वास्थ्य अवस्था नाजुक छ । २०६८ सालमा निमोनिया भएका बेला चिकित्सकले क्षयरोगको औषधि सेवन गराएपछि फोक्सोमा असर गर्यो । काठमाडौंमा एक वर्ष बसेर उपचार गराए । ‘फोक्सोको तीनपटक अप्रेशन गरेपछि निको भयो,’ सन्तले भने, ‘अहिले पनि गह्रौं काम गर्दा घाउबाट रगत बग्छ ।’ न्यायका लागि जिल्ला प्रशासन र अदालत धाउँदा उनीहरुका अटो रिक्सा रित्तै हुन्छन् । अटोमा सर्वसाधरण ओसार्दा पनि उनीहरुको पिठ्यूँमा झोला छुट्दैन ।

लालजीत र सन्तका बुवा फौदार हुन भने सुखु उनीहरुका काका हुन् । फौदारका दुई छोरा र ५ छोरी छन् । तर, काका सुखु र काकी कवुतरीबाट सन्तान भएनन् । बुवा फौदारको २०७७ जेठ ८ र आमा झिनाको भने ११ वर्षअघि मृत्यु भइसकेको छ । सुखुको २०७८ असार १७ र काकी कवुतरीको २०७७ माघ १० मृत्यु भइसकेको छ । सन्तान नजन्मिएपछि लालजीत र सन्तले नै काका–काकीको रेखदेख गरेका थिए ।

‘काका–काकी दुःख बिरामी हुँदा, औषधि उपचारदेखि मृत्युपछिका सम्पूर्ण संस्कार दुईभाईले गरेका हौं’, सन्तले भने, ‘बुवाआमा र काकाकाकी बाचुन्जेल कसैको दावी थिएन । उहाँहरु मरेपछि एकाएक मालती र रिखीदेवी छोरी बनेर आइपुगे ।’ त्यसपछि बुवाआमा र काका–काकीको मृत्युपछि लालजीत र सन्तले काकाको नाममा रहेको जायजेथा आफूहरुका नाममा गर्नका लागि रुपन्देही जिल्ला अदालतमा मुद्दा दर्ता गरे ।

तत्कालीन न्यायाधीश लीलाराज अधिकारीको इजलासले २०७८ कार्तिक १५ गते फौदार र सुखुको नाममा रहेको जमिन लालजीत र सन्तको नाममा जाने फैसला सुनाएको थियो । उक्त फैसलापछि दाजुभाईले अंशबण्डा गरेर सम्पत्ति आफ्नो नाममा गराएका थिए । सम्पत्ति नाममा आएपछि दुःख सुरु भयो । लालजीतका अनुसार २०७८ फागुन १० गते अंश मुद्दा परेको उल्लेख गरेर जिल्ला अदालतले म्याद पठायो । ‘म्याद बुझेर हामी अदालत गयौं,’ लालजीतले भने, ‘त्यसपछि बल्ल काकाको नक्कली छोरी बनेर अंशका लागि सिद्धार्थनगर–८ की रिखीदेवी मल्लाह अग्रवाल र मायादेवी गाउँपालिका–३ की मालती मल्लाहले मुद्दा हालेको थाहा भयो ।’ अंश मुद्दा हाल्ने रिखिदेवी र मालतीले सुखुका दुई श्रीमती रहेको दावी गरिरहेका छन् ।

अदालतमा रिखिदेवीले सुखुको पहिलो श्रीमती कवुतरी र मालतीले दोस्रो श्रीमती फूलझरीको छोरी भएको दावी गरेको दाजुभाईले बताए । मालती र रिखिदेवीले आफूहरु सुखुको छोरी भएको दावी गरेर सिद्धार्थनगर नगरपालिका–६, मा सुखुको मृत्युदर्ता माग गरेका थिए । पहिलोपटक माग गर्दा वडा कार्यालयले दर्ता गर्न मानेन् । त्यसपछि उनीहरुले उच्च अदालत बुटवलमा सिद्धार्थनगर नगरपालिका र वडा नं. ६ को कार्यालयविरुद्ध मुद्दा दायर गरेको सन्तले बताए । पहिलोपटक अदालतमा उनीहरुले सुखु मल्लाहको छोरी भएको प्रमाण पेस गर्न सकेनन् ।

त्यसबेला अदालतमा मालती र रिखिदेवीले एकअर्कालाई आफू मात्रै सुखुको छोरी भएको दावी गर्दै मुद्दा लडेका थिए । तर, अदालतले मालतीको जन्म र बाबु दावी गरिएका सुखुको जन्ममिति जम्मा ६ वर्ष फरक देखिएको तथा रिखिदेवीको दावी र प्रमाण झुठा भएको भन्दै न्यायाधीश अच्युतप्रसाद भण्डारीको इजलासले २०७८ माघ ५ गते रिट निवेदन नै खारेज गरिदिएको थियो । त्यसपछि रिखिदेवीले मैले दुबै आमाको पालनपोषण, शेषपछि काजक्रिया गरेको र उनीहरुको अंश हक खाने आफू एक्लै हकवाल भएको भन्दै २०७८ पुसमा लालजीत र सन्तको नाममा गएको जमिन आफ्नो नाममा ल्याउन माग दावी गर्दै रुपन्देही जिल्ला अदालतमा मुद्दा हालिन् ।

त्यतिबेला जिल्ला अदालतले पहिलो सुखुको छोरी भएको प्रमाणित भइसकेपछि मात्र अंश पाउने फैसला सुनायो । त्यसपछि लालजीत र सन्त झुठो विवरण खारेजीको माग गर्दै उच्च अदालत बुटवल पुगे । उच्च अदालतले पनि जिल्लाकै फैसला सदर गर्यो । दाजुभाई अहिले पनि मालती र रिखिदेवीको बाबु सुखु नभएको विवरण कायम गरिदिन माग गर्दै धाइरहेका छन् । पछिल्लो पटक जिल्ला प्रशासनले प्रहरी तैनाथ गरेर २०८० कार्तिक ७ गते सिद्धार्थनगर–६, बाट स्थलगत सर्जमिन मुचुल्का उठाइएको थियो । वडाध्यक्षको रोहबरमा गरिएको मुुचुल्कामा पनि सुखु मल्लाहको सन्तान नभएको प्रमाणित गरिएको छ । नयाँ सर्जमिन मुचुल्का तयार गरे पनि जिल्ला प्रशासनले अहिलेसम्म रिखिदेवी र मालतीको बुवा सुखु नभएको प्रमाणित गर्न मानेको छैन ।

‘जिल्ला प्रशासनले सुखुको सन्तान नभएको प्रमाणित गर्न पनि मानेको छैन,’ लालजीतले भने, ‘डीएनए परीक्षण गरिदिनुस् भन्दा समेत न अदालत सुन्छ, न त प्रशासनले सुनुवाई गर्छ ।’ जिल्ला अदालत रुपन्देहीमा पनि दाजुभाईले रिखिदेवी र मालतीको नामको अंश नामसारी खारेज र जालसाजी मुद्दा हालेका छन् । उक्त मुद्दा अहिले विचाराधीन छ । साथै अख्तियार दुरुपयोग अनुसन्धानको बुटवल कार्यालयमा पनि झुठो विवरण पेश गरेर लिएको नागरिकता खारेज गर्न माग गर्दै उजूरी गरेको सन्तले बताए । जिल्ला प्रशासन पुगेका दाजुभाईलाई प्रमुख जिल्ला अधिकारी माधवप्रसाद पोखरेलले मुद्दाको फाइल अध्ययन गरेर यथार्थ जानकारी दिने बताए । ‘मुद्दा शाखाबाट फाइल झिकाएर अध्ययन गर्छु,’ उनले भने, ‘त्यसपछि के गर्न सकिन्छ सहयोग गर्छु ।’