सुस्तामा सीमा मानिँदै आएको सिमलको रुख बाढीले बगायो, सीमा विवाद थप जटिल बन्ने चिन्ता

Advertisement

परासी– सुस्तामा नेपाल–भारतको सीमा भनिँदै आएको सिमलको रुख बाढीले बगाएको छ । पश्चिम नवलपरासीको सुस्तामा लामो समयदेखि सीमा छुट्टाउनका लागि दुवै देशले त्यही सिमलको रुखलाई मान्दै आएका थिए ।

Advertisement

सीमा स्तम्भ नहुँदा साङ्केतिक रूपमा सीमा छुट्याउँदै आएको रुख नै बाढीले बगाएको हो । सुस्तामा २२० घरधुरीका १४ सय ५७ घरपरिवारको बसोबास छ ।विवादलाई समाधान गर्नका लागि सुस्तासँग सीमा जोडिएका नेपाल र भारतका जिल्लास्तरका सुरक्षा प्रमुख र स्थानीयको सहभागितामा १८ वर्षअघि (२०६५ सालमा) सिमलको रुखलाई साङ्केतिक सीमा चिन्ह मान्दै आइएको थियो ।

सुस्ता बचाउ अभियानका अध्यक्ष आदम खाँले आपसी सहमतिमा साङ्केतिक रूपमा कायम गरिएको सिमलको रुख नारायणीको बाढीले बगाएको जनाए । नवलपरासीको नारायणी नदी पारी रहेको सुस्तामा सीमा स्तम्भ नहुँदा भारतीय पक्षले पटक–पटक विवाद गर्दै आएको छ । पछि सुस्तामा सीमा सुरक्षाको विषय जटिल बन्नसक्ने भन्दै तत्कालका लागि स्थानीयस्तरमा आउनसक्ने विवादतर्फ ध्यान दिन सुस्ताबासीले सम्बन्धित निकायले ध्यान दिन माग गरेका छन् ।

‘गएराति नारायणी नदीमा आएको बाढीले उक्त रुख बगाएर लगेको हो । बाढीका कारण सुस्ताको थारु टोलामा समेत पानी पसे पनि ठूलो क्षति भने पुगेको छैन’, उनले भने ।

सुस्ता गाउँलाई बाढीबाट जोगाउन नारायणी नदीमा सरकारले १ सय ३२ मिटर तटबन्ध निर्माण गर्न लागेको थियो । तर उक्त तटबन्धलाई महिना दिनअघि भारतीय एसएसबीले अवरोध गरेका कारण काम अघि बढ्न नसक्दा सोही क्षेत्रबाट बाढी पसेको स्थानीयले बताएका छन् ।