ब्रह्माकुमारी भैरहवामा बृहत् रक्तदान कार्यक्रम हुँदै

पब्लिक कुरा
२०८३ भाद्र ४

390 Share

भैरहवा– ब्रह्माकुमारी ईश्वरीय विश्व विद्यालयका पूर्व अन्तर्राष्ट्रिय प्रमुख राजयोगिनी डा.दादी प्रकाशमणिको १९औँ पुण्य स्मृति दिवस तथा विश्वबन्धुत्व दिवसको अवसरमा भैरहवामा बृहत् रक्तदान कार्यक्रम आयोजना हुने भएको छ ।

‘रक्तदान गरौं पुण्य कमाऔं, विश्वबन्धुत्वतर्फ एक कदम बढाऔं’ भन्ने नारासहित संस्थाको समाजसेवा विभागले विश्वव्यापी रूपमा आयोजना गर्न लागेको बृहत् रक्तदान कार्यक्रमअन्तर्गत भैरहवामा पनि रक्तदान कार्यक्रम आयोजना गर्न लागिएको हो ।

ब्रह्माकुमारीज भैरहवाको आयोजनामा तथा नेपाल रेडक्रस सोसाइटी भैरहवाको प्राविधिक सहयोगमा कार्यक्रम सञ्चालन हुनेछ । आयोजकका अनुसार रक्तदानमार्फत मानव सेवासँगै विश्वबन्धुत्वको भावना अभिवृद्धि गर्ने उद्देश्यले कार्यक्रम आयोजना गर्न लागिएको हो ।

विश्वविद्यालय भैरहवा प्रमुख ब्रह्माकुमारी शान्ति दिदीले कार्यक्रममा सहभागी भई रक्तदान गर्न तथा कार्यक्रमलाई सफल बनाउन सबैलाई आग्रह गरिन् । ‘रक्तदान गरौँ, पुण्य कमाऔँ, विश्व बन्धुत्वतर्फ एक कदम बढाऔँ’ भन्ने सन्देशसहित आयोजना हुने कार्यक्रममा विभिन्न क्षेत्रका व्यक्तिहरूको सहभागिता रहने आफूहरुको अपेक्षा रहेको उनको भनाई छ ।

रक्तदान कार्यक्रम भदौ ६ गते शनिबार बिहान ७ः३० बजेदेखि ब्रह्माकुमारी ईश्वरीय विश्व विद्यालय, सिद्धार्थनगर नगरपालिका–१२, भैरहवामा सञ्चालन हुनेछ । आयोजक ब्रह्माकुमारीज भैरहवाले रक्तदान जीवनदानसमेत भएकाले स्वस्थ व्यक्तिहरूलाई कार्यक्रममा सहभागी भई रक्तदान गर्न अनुरोध गरेको छ ।