यसपटक रूपन्देहीका ठूला होटलमा ‘तीज उत्सव’

Advertisement

भैरहवा– हिन्दु नारीहरुको महान पर्व हरितालिका तीज नजिकिँदै जाँदा रुपन्देहीका ठूला होटलहरुले ‘तीज फेस्टिबल’ आयोजना गर्दैछन् । खासगरी तारे होटलहरुले तीजलाई उत्सव बनाउन विभिन्न प्याकेजहरु समेत सार्वजनिक गरेका छन् । यसपटक हरितालिका तीज २९ गते परेको छ । हरितालिका तीज भन्दा पहिल्यै होटलहरुले कार्यक्रम आयोजना गर्न लागेका हुन् ।

Advertisement

तीज पछिल्लो समय महिनौं दिन पहिलेदेखि मनाउने गरिँदै आएको छ । होटल तथा रेष्टुरेन्टहरुमा दर खाने र रमाइलो गर्ने गरिन्छ । तीजलाई फेस्बिलका रुपमा मनाउन भैरहवास्थित चारतारे होटल मौर्यले योजना अघि सारेको छ । महिना पहिलेदेखि नै मौर्य होटलले प्रबद्र्धन गरिरहेको छ ।

‘मौर्य होटलमा तीजको उत्सव’ शीर्षक दिएर उसले प्रचारप्रसार गरिरहेको छ । ‘यसपटकको तीजमा स्वादिष्ट परिकार, संगीत, नृत्य र अविस्मरणीय क्षणहरूसँगै प्रेम, खुसी र आत्मीयताको सम्बन्धलाई अझ विशेष बनाउन हामीले मौर्य होटलमा सबैलाई निमन्त्रणा गरेका छौं’, होटलका महाप्रबन्धक ओमप्रकाश पाण्डेले भने ।

उनका अनुसार यहाँ तीज उत्सव मनाउन आउने दिदीबहिनीहरुले रुफटप स्विमिङ पुल, बहु–परिकार रेस्टुरेन्ट, आकर्षक बैंक्वेट हलको सुविधा पाउने छन् । यससँगै विभिन्न खानाका परिकारको स्वाद लिनेछन् । होटलले यसका लागि प्रतिव्यक्ति प्याकेज पनि सार्वजनिक गरेको छ । सिल्भर ९९९, गोल्ड १ हजार १९९, प्लाटिनम १ हजार ४९९ रुपैयाँ तोकेको छ । यो प्याकेज व्यक्तिले चाहेअनुसार खरिद गरी मौर्यमा रमाइलो गर्न सक्नेछन् ।

परिवार तथा साथीहरूसँग तीजको रमाइलो, विविध स्वादिष्ट परिकार, संगीत तथा नृत्य, परिवार तथा साथीहरूका लागि उत्तम र सधैँ सम्झनलायक मीठा क्षणहरू यो पटक मौर्य होटलले पस्कने महाप्रबन्धक पाण्डेले बताए । ‘परम्परा कायम राख्दै तीज मनाऔँ, सम्झनाहरू सिर्जना गरौँ, आजै आफ्नो तीज उत्सव बुक गरौं’, उनले भने ।

यस्तै, भैरहवाकै चारतारे होटल एसियन बुद्धमा पनि यसपटक तीज विशेष कार्यक्रम हुँदैछ । साथीहरूसँग रमाइलो जमघट र परिवारसँगको अविस्मरणीय तीज उत्सव होस् भन्ने हेतुले कार्यक्रम आयोजना गरिएको होटलले जनाएको छ ।

होटलले आरामदायी जमघटका लागि विशाल बैंक्वेट हल, स्वादिष्ट तथा परम्परागत तीज विशेष परिकार, लाइभ म्युजिक तथा फोटो सुटको सुविधा उपलब्ध गराउने जनाएको छ । कर्पोरेट तीज कार्यक्रम, महिला ग्यादरिङ, साथीभाइ तथा परिवारको जमघट, ग्रुप डाइनिङ वा निजी तीज कार्यक्रम आयोजना गर्दा पनि बजेट अनुसार सुविधा उपलब्ध हुने एसियन बुद्ध होटलले जनाएको छ ।

यसैगरी भैरहवाको पाँचतारे होटल सिद्धार्थ भिलासाले पनि तीज विशेष कार्यक्रम योजना अघि सारेको छ । सिद्धार्थले तीजलाई रमणीय र उत्सवकारुपमा मनाउन आह्वान गरेको छ । सिद्धार्थका अनुसार परम्परागत तीज विशेष बुफे, प्रत्येक्ष सांगीतिक साँझ, सांस्कृतिक प्रस्तुति, तीज विशेष फोटो कर्नर, लक्की ड्र तथा विशेष उपहार र स्वागत पेयका योजना अघि सारेको छ । भिलासामा तीजको विशेष उत्सव, स्वादिष्ट परिकार, संगीत, नृत्य र मनोरञ्जनको अविस्मरणीय अनुभव लिन पाइने छ ।

यस्तै जिल्लाको तिलोत्तमास्थित पाँचतारे होटल टाइगर प्यालेस बाइ सोल्टीले पनि हिन्दु नारीहरुको महान पर्व तीजलाई लक्षित गरी ‘तीज उत्सव’ योजना अघि सारेको छ । टाइगरले विशेष हरितालिका तीज बुफे, स्वागत पेय, उत्सवमय मनोरञ्जन तथा रमाइला गतिविधिहरू, अतिथिहरूका लागि नृत्य फ्लोर र प्रत्यक्ष सांगीतिक प्रस्तुति रहने जनाएको छ । उसले प्रतिव्यक्ति दुई हजार रुपैयाँ तोकेको छ । यति मात्रै होइन्, बुटवल–भैरहवाका अधिकांश होटलले यसपटक तीज उत्सव कार्यक्रम आयोजना गर्दै छन् ।