लुम्बिनीलाई बौद्धमार्गी र आध्यात्मिक पर्यटनको प्रमुख गन्तव्य बनाउनुपर्छ: मुख्यमन्त्री आचार्य
Advertisement
भैरहवा- लुम्बिनी प्रदेशका मुख्यमन्त्री चेतनारायण आचार्यले बुद्धिष्ट अन्तर्राष्ट्रिय ट्राभल मार्टले लुम्बिनीसँगै समग्र नेपाललाई बौद्ध तीर्थयात्रा र आध्यात्मिक पर्यटनको प्रमुख गन्तव्यका रूपमा स्थापित गर्न महत्वपूर्ण योगदान पुग्ने विश्वास व्यक्त गरेका छन् ।
Advertisement
आइतबार तेस्रो बौद्ध अन्तर्राष्ट्रिय बुद्धिष्ट ट्राभल मार्टकाे भैरहवामा आयायाेजित समापन समाराेहमा बाेल्दै मुख्यमन्त्री आचार्यले प्रदेश सरकारले बौद्ध सर्किट र समग्र लुम्बिनीको विकासका लागि ‘लुम्बिनी पर्यटन सर्किट’ को अवधारणा अघि बढाएको र यसले लुम्बिनीलाई नयाँ उचाइमा पुर्याउने अपेक्षा गरिएको जनाए ।
लुम्बिनीलाई केन्द्रमा राखी देवदह, रामग्राम, तिलौराकोटलगायत सम्पदालाई जोड्दै बौद्ध सर्किटको विकासलाई उच्च प्राथमिकतामा राखिएको छ । लुम्बिनी विकास गुरुयोजनाको प्रभावकारी कार्यान्वयन तथा लुम्बिनी विकास प्राधिकरण गठनको तयारी भइरहेको जानकारी पनि उनले दिए ।
मुख्यमन्त्री आचार्यले प्रदेश सरकारले प्राचीन स्मारक, पुरातात्त्विक र सांस्कृतिक सम्पदाको संरक्षण तथा प्रवर्द्धन, पर्यटकीय सूचना प्रवाहका लागि डिजिटल प्लेटफर्मको विकास, उत्तरगण्डकी महास्नान मेला, रुरु क्षेत्रको गुरुयोजना कार्यान्वयन, विभिन्न मेला-महोत्सवको आयोजना, होमस्टे प्रवर्द्धनलगायतका कार्यक्रमलाई प्राथमिकताका साथ अघि बढाइरहेको बताए।
त्यस्तै, उनले बीआईटीएमको सन्दर्भमा भारत, चीन, श्रीलंका, थाइल्याण्ड, मलेसिया, इन्डोनेसिया, भुटान, म्यानमार, सिंगापुर, नेदरल्यान्ड्स लगायतका मुलुकबाट आएका ट्राभल एजेन्टहरू तथा बीबीसी, अलजजिरा, सीसीटीभी, एएफपी, रिउटर, नेशनल जियोग्राफिकजस्ता सञ्चारमाध्यमका प्रतिनिधिहरूप्रति विशेष धन्यवाद व्यक्त गरे ।
`लुम्बिनी प्रदेशलाई मुलुककै प्रमुख पर्यटकीय गन्तव्यका रूपमा स्थापित गर्ने हाम्रो लक्ष्य हो´, मुख्यमन्त्री आचार्यले भने, `टुरिजमले रोजगारी सिर्जना, आर्थिक विकास र नेपालको अन्तर्राष्ट्रिय पहिचान अभिवृद्धिमा महत्वपूर्ण योगदान पुर्याउने छ भन्ने हाम्रो दृढ विश्वास छ ।´
मुख्यमन्त्री आचार्यले प्रदेश सरकारले आगामी आर्थिक वर्षभित्र पर्यटन क्षेत्रको योगदान कुल गार्हस्थ उत्पादनमा चार प्रतिशतबाट सात प्रतिशतमा पुर्याउने र आन्तरिक तथा बाह्य पर्यटकको संख्या २२ लाख नाघ्ने लक्ष्य लिएको जानकारी दिए ।
उनले लुम्बिनीलाई आध्यात्मिक अनुसन्धान केन्द्रका रूपमा विकास गरी संरचना र सेवा सुविधायुक्त बनाउँदै विश्व शान्तिको सन्देश फैलाउने दिशामा प्रदेश सरकार दृढताका साथ लागिपरेको उल्लेख गरे ।
नेपालको बौद्ध धर्मसम्बन्धी तीर्थ पर्यटन प्रवर्द्धनका लागि केन्द्रित यो मार्ट नेपालसहित अन्तर्राष्ट्रिय बजारमा बौद्ध पर्यटन प्रवर्द्धन गर्न महत्वपूर्ण मानिएको छ । ट्राभल मार्टमा पर्यटन क्षेत्रका सरोकारवाला, आध्यात्मिक व्यक्तित्व, प्रदर्शक तथा विदेशी प्रतिनिधिहरूको सहभागिता रहेको थियाे ।
प्रदेश सरकारको नेतृत्वमा लुम्बिनीलाई अन्तर्राष्ट्रिय धार्मिक, सांस्कृतिक र आध्यात्मिक गन्तव्यका रूपमा विकास गर्न पहल भइरहेको छ ।
यस कार्यक्रमले नेपालमा धार्मिक तथा सांस्कृतिक पर्यटन प्रवर्द्धन गर्दै, विशेषतः लुम्बिनीलाई विश्वसामु अझ सशक्त रूपमा प्रस्तुत गर्ने विश्वास गरिएको छ । नेपाल पर्यटन बाेर्ड, नाट्टा नेपाल लगायतले कार्यक्रम आयाेजना गरेका हुन् । ट्राभल मार्टकाे काठमाडौंमा उद्घाटन गरिएको थियाे ।
प्रतिकृया दिनुहोस्