‘सिद्धबाबा धामलाई धार्मिक पर्यकीय हब बनाउन बृहत् गुरुयोजना आवश्यक’

बुटवल– लुम्बिनी प्रदेशका सभामुख तुलाराम घर्ती मगरले सिद्धबाबा मन्दिर क्षेत्रलाई धार्मिक पर्यटकीय क्षेत्रकारुपमा बिकास गर्न गुरुयोजना आवश्यक रहेको बताएका छन् । तिनाउ नदीमा जलासय निर्माण गरी जलासयमा आरतीको ब्यवस्था मिलाउन सकिने सम्भावना रहेको उनले बताए ।

Advertisement

सिद्धबाबा मन्दिर बिकास समितिको आयोजनामा मंगलबार सामूहिक चौरासी पुजा महोत्सवको शुभारम्भ गर्दै उनले भने, ‘यहाँ धार्मिक पर्यटक भित्र्याउन सकिने आधार तयार भएको छ । सिद्धबाबा धाम क्षेत्रको बिकासले पाल्पाको मात्र होइन्, सिङ्गो प्रदेशकै बिकासमा टेवा पुर्याउने छ ।’ उनले नजिकैको रामापिथेकस, तिनाउ ड्याम झरना, तिनाउ नदी किनारमा ट्रेकिङ रुट जोडेर बृहत गुरुयोजना बनाउन आवश्यक रहेको जनाए ।

Advertisement

समितिले मन्दिर परिसरमा शिशु स्तनपान कक्ष संचालन गरेको छ । त्यसैगरि कालीगण्डकीबाट ल्याइएको शालिग्राम दर्शनको लागि ब्यवस्था गरिएको समितिका अध्यक्ष सन्तोषलाल शेरचनले जानकारी दिए । सन्तानेश्व धामका संरक्षक एवं धर्मगुरु किशोर गौतमले कालीगण्डकीको शालिग्राम सिद्धबाबा मन्दिरमा प्राणप्रतिस्ठा गरे । उनले चिल्ड्रेन पार्क, सिद्ध गुफामा जाने सिढीं निर्माण, भक्तजन आश्रम स्थल आदि गुरुयोजना बनाएर काम गर्ने बताए ।

तिनाउ गाउँपालिका अध्यक्ष प्रेम श्रेष्ठले सिद्धबाबा पाल्पाको हरि गुरुद्वार नै रहेको जनाए । समितिका सदस्य एवं चौरासी पुजा कार्यक्रम संयोजक गोपाल बश्यालले समितिले नै खर्च गरि चौरासीपुजा गरिएको जानकारी दिए । आर्थिक अभावमा उमेर पुगेका कोही पनि चौरासी पुजा गर्नबाट बञ्चित हुन नपरोस् भनेर सामूहिक चौरासी पुजालाई निरन्तरता दिने योजना रहेको धामका प्रमुख पण्डित लक्ष्मी सापकोटाले जानकारी दिए ।

यसैबीच सिद्धबाबा धामको गुरुयोजना तयार गर्नका लागि सरोकारवालासँग छलफल गरिएको छ । भेटी दानबाट वार्षिक १ करोड भन्दा बढी आम्दानी हुने समितिले जनाएको छ । इन्जिनियर बिनोद खड्काले गुरुयोजना बनाएर काम गर्दा ब्यवस्थित हुने बताए ।