राष्ट्रिय सभा उपनिर्वाचनमा लुम्बिनी प्रदेशका चार मन्त्रीले पनि मतदान गर्न पाउने

भैरहवा– यसअघि मतदाता नामावलीबाट नाम हटाइएका लुम्बिनी प्रदेशका ४ मन्त्रीले सोमबार हुने राष्ट्रिय सभा उपनिर्वाचनमा मतदान गर्न पाउने भएका छन् ।

Advertisement

सर्वोच्च अदालतले जेठ ३ गते अल्पकालीन आदेश जारी गरेबमोजिम संविधानको धारा १२८ को उपधारा ४ को व्यवस्था अनुसार पूरक मतदाता नामावलीका रुपमा प्रदेश निर्वाचन कार्यालयले उनीहरूलाई मतदाताका रूपमा समावेश गरिएको उल्लेख गरेको छ ।

Advertisement

उपेन्द्र यादव पक्षीय जनता समाजवादी पार्टीले केपी शर्मा ओली पक्षीय नेकपा एमाले नेतृत्वको सरकारमा सहभागी भएको भन्दै मन्त्रीसमेत रहेका प्रदेश सभा सदस्य सन्तोष कुमार पाण्डेय, विजयबहादुर यादव, सुमन शर्मा रायमाझी र कल्पना पाण्डेको सांसद पद नै निलम्बन गरेको थियो । तर सर्वोच्चले उनीहरुको सांसद पद थमौती गरेको थियो ।

सर्वोच्चले पद थमौती गरे पनि यसअघि निर्वाचन आयोगले प्रकाशित गरेको नामावलीबाट उनीहरूको नाम हटाइएको भए पनि मतदान गर्न पाउने व्यवस्था गरिएको प्रदेश निर्वाचन कार्यालयले जानकारी दिएको छ । आयोगको यो निर्णयसँगै उनीहरूले भोली हुने उपनिर्वाचनमा मतदान गर्न पाउने छन् ।

लुम्बिनी प्रदेशको राष्ट्रिय सभा उपनिर्वाचनमा यसअघि प्रदेश सभातर्फका ७९ जना सांसद मतदाता रहे पनि ४ जना थप भएपछि मतदाता प्रदेश सांसदको संख्या ८३ पुगेको छ भने कुल मतदाता ३ सय पुगेको निर्वाचन आयोगले जनाएको छ ।

स्थानीय तहका प्रमुख, उपप्रमुख र अध्यक्ष, उपाध्यक्ष गरी २ सय १७ मतदाता छन् । भोलि दाङ घोराहीस्थित कर्मचारी मिलन केन्द्रमा हुने राष्ट्रिय सभा उपनिर्वाचनको सम्पूर्ण तयारी पूरा भएको निर्वाचन आयोगले जनाएको छ ।

राष्ट्रिय सभा सदस्य उपनिर्वाचनमा कोभिड पोजेटिभका लागि छुट्टै मतदानस्थल बनाइएको छ । निर्वाचनमा मतदान गर्ने मतदाताहरुले अनिवार्य पीसीआर परीक्षण रिपोर्ट ल्याउनुपर्ने व्यवस्था गरिएको छ ।

राष्ट्रिय सभा सदस्य उपनिर्वाचनमा दुई जनाको उम्मेदवारी परेको छ । कांग्रेस, माओवादी केन्द्र, जनता समाजवादी पार्टी र राष्ट्रिय जनमोर्चाको विपक्षी गठबन्धनका तर्फबाट दृगनारायण पाण्डे र एमालेका तर्फबाट चन्द्रबहादुर खड्काले उम्मेदवारी दिएका छन् । भोलि बिहान ९ बजेदेखि दिउँसो ३ बजेसम्म मतदान समय तोकिएको मुख्य निर्वाचन अधिकृत रीतेन्द्र थापाले बताए ।