मारवाडी युवा संगठनद्वारा ५८ जनालाई कृत्रिम हातखुट्टा हस्तान्तरण

पब्लिक कुरा
२०८२ फाल्गुन ९

842 Share

भैरहवा– नेपाल राष्ट्रिय मारवाडी युवा संगठनले विभिन्न कारण हात–खुट्टा गुमाएका सर्वसाधरणलाई शनिवार कृत्रिम हात–खुट्टा वितरण गरेको छ । मारवाडी सेवा समिति भैरहवाको सहयोगमा तीन दिने शिविर आयोजना गरेर यस्ता व्यक्तिलाई समाग्री हस्तान्तरण गरिएको हो ।

भैरहवास्थित मारवाडी सेवा समितिको कार्यालयमा बिहीबारबाट शिविर सुरु भएको थियो । पहिलो दिन यस्ता समाग्रीका लागि नाम दर्ता गराएका व्यक्तिका हात–खुट्टाको नाप लिएको थियो । शुक्रबार नाँप अनुसार प्राविधिकले हात–खुट्टा तयार गरेका थिए । यसरी तयार सहयोग समाग्री शनिवार बिहान विशेष कार्यक्रम आयोजना गरेर सहयोगापेक्षीलाई हस्तान्तरण गरिएको राष्ट्रिय मारवाडी युवा संगठनका राष्ट्रिय अध्यक्ष मनोजकुमार अग्रवालले जानकारी गराए । ‘यहाँहरुलाई अब नयाँ आत्मविश्वास बढेको हामीले पाएका छौं, मानवीय सेवा गर्न पाउँदा निकै हर्षित छौं’, उनले भने । आयोजकका अनुसार ५८ जनालाई कृत्रिम हातखुट्टा वितरण गरिएको हो ।

शिविरमा दुर्घटना लगायत विभिन्न कारणबाट हातखुट्टा गुमाएर लामो समयदेखि बसेका व्यक्तिलाई सहयोग उपलब्ध गराइएको हो । अध्यक्ष अग्रवालले विशुद्ध मानवीय सेवालाई ध्यानमा राखेर शिविर संचालन गरिएको बताए । उनका अनुसार शारीरिक रुपमा अक्षम नागरिकलाई सहयोग गरिएको हो । शिविरमा सहभागीले निःशुल्क हात खुट्टा पाउँद खुशी व्यक्त गरे ।

शिविरमा रुपन्देहीसहित मुलुकका विभिन्न ठाउँबाट सहभागिता थियो । आयोजकका अनुसार भैरहवामा तेस्रोपटक निःशुल्लक कृत्रिम हातखुट्टा वितरण शिविर संचालन गरिएको हो । संघले यसअघि भैरहवासहित अन्य सहरहरुमा आयोजना गरेको यस्तो शिविरबाट हालसम्म साढे ३ सय भन्दा धेरैलाई कृत्रिम हातखुट्टा सहयोग गरेको छ । भारतबाट प्राविधिकहरु ल्याएर कृत्रिम हातखुट्टा बनाइएको थियो ।

मारवाडी सेवा समितिका अध्यक्ष श्रवण बेरिवाल, पूर्वअध्यक्ष हेमन्त अग्रवाल, समाजसेवी तथा पूअध्यक्ष नारायणप्रसाद अग्रवालले सबैको सहयोगले मानवीय काम गर्न पाउँदा आत्मसन्तुष्टि मिलेको सुनाए । कृत्रिम हातखुट्टा हस्तान्तरण कार्यक्रममा युवा संगठन र मारवाडी सेवा समितिका पदाधिकारी र सदस्य तथा सामाजिक अगुवाहर सहभागी थिए ।