बर्दियामा कुकुर आतँक

Advertisement

बर्दिया—जिल्लामा कुकुर आतंक भएको छ । जिल्लाका विभिन्न ठाउँमा कुकुरले टोकेर घाइते हुनेको संख्या हवात्तै बढेको छ । जिल्ला अस्पतालमा रेबिजविरुद्ध खोप अभावले बिरामी समस्यामा छन् । कुकुरको टोकाईबाट दैनिक १५ देखि २० जना बिरामी आउने गरेको जिल्ला अस्पतालले जनाएको छ ।

Advertisement

लामो समयदेखि रेबिज खोपको अभावमा पीडित बिरामी नेपालगन्ज र कोहलपुर जाने गरेको बताउँछन् । बर्दिया अस्पतालमा करिब २ महिनादेखि रेबिजविरुद्ध खोपको अभाव भएको अस्पतालका मेडिकल सुपरिन्टेन्डेन्ट सुभाष पाण्डेयले बताए । रेबिजको खोपकालागि सम्बन्धित निकायमा पत्रचार गरिएको उनले जनाए । प्रदेश सरकारबाट उपलब्ध हुने खोप कहिले आउँछ यकिन नभएको अस्पतालले जनाएको छ ।

अस्पतालमा खोप अभाव भएपछि बजारमा महँगोमा खरिद गर्न बाध्य रहेको पीडित परिवारले जनाएका छन् । बजारमा रेबिज खोपको प्रति भायल ३ हजार ५ सय रहेको औषधि व्यवसायी बताउँछन् । जिल्लामा गत साउनदेखि यता हाल सम्म करिब ७ सय ५६ जना कुकुरको टोकाइबाट घाइते भएको स्वास्थ्य कार्यालय, बर्दियाका सूचना अधिकारी पद्या श्रेष्ठले बताइन् ।

वार्षिक करिब ५ सय भायल खोप आउने गरेकोले पु¥याउन नसकेको स्वास्थ्यकर्मी बताउँछन् । कुकुरको टोकाइबाट प्रभावित गुलरिया, मधुवन, राजापुर लगायत नगरपालिकाबाट बढी खोपका लागि यहाँ आउने गरेका छन् ।

मधुवन नपा–४ का दुर्गा खत्रीले रेबिज खोप जिल्ला अस्पतालमा नपाएपछि नेपालगन्ज जानु परेको बताए । बहुला कुकुरले टोकेको २१ दिनभित्र भ्याक्सिन लगाउनुपर्ने हुन्छ । यसका लागि कुकुरको पहिचान गर्नु जरुरी रहेको चिकित्सक बताउँछन् ।