संजय साई सेवा समूहद्वारा क्यान्सर पीडित महिलालाई आर्थिक सहयोग

Advertisement

भैरहवा– श्री संजय साई सेवा समूह, भैरहवाले ब्रेस्ट क्यान्सर पीडित भैरहवाकी एक महिलालाई आर्थिक सहयोग गरेको छ । सेवा समूहले भैरहवामा आयोजित एक कार्यक्रममा क्यान्सर पीडित लक्ष्मी थापालाई आर्थिक सहयोग गरेको हो ।

Advertisement

लक्ष्मी सिद्धार्थनगर–८ निवासी हुन् । उनी लामो समयदेखि ब्रेस्ट क्यान्सरसँग लड्दै आएकी छन् । लक्ष्मीको आर्थिक अवस्था निकै कमजोर भएकाले उपचारमा थोरै भए पनि सहजता होस् भन्ने हेतुले आर्थिक सहयोग गरेको संस्थाका अध्यक्ष राजेन्द्र थापाले बताए ।

आर्थिक अस्वथा निकै न्युन भएकी उनलाई सेवा समूहले ३३ हजार ३ सय ३३ रुपैयाँ सहयोग गरेको हो । सेवा समूहका अध्यक्ष राजेन्द्र थापा, क्यान्सर सपोर्ट समूहका केन्द्रीय अध्यक्ष दीलिप भट्टराई, संस्थाका महासचिव कुमार केसी, कार्यक्रम संयोजक भरत केसीले क्यान्सर पीडित थापालाई सहयोग रकम हस्तान्तरण गरेका हुन् ।

‘हामी सधैं मानवीय सेवामा समर्पित हुँदै आएका छौं’, सेवा समूहका अध्यक्ष थापाले भने, ‘संस्थागत रुपमा जहाँ समस्या हुन्छ, त्यहाँ केही न केही सहयोग गर्दै आइरहेका छौं । जसले गर्दा विरामीहरुलाई उपचारमा थोरै भए पनि राहत पुगेको महसुस गरेका छौं ।’ उनले क्यान्सर उपचार महंगो भएकाले सहयोगी दाताहरुलाई विरामीलाई सहयोग गर्न आह्वान समेत गरे । आर्थिक सहयोग पाएपछि लक्ष्मीले संस्थाको सहयोगले आफूलाई थोरै भए पनि हौसला मिलेको जनाइन् ।