‘अलौकिक’ बाबालाई प्रशासनद्वारा रोक

दाङ– मुलुकका विभिन्न जिल्लामा अलौकिक मनोवैज्ञानिक उपचारका नाममा ठगी गरिरहेको आरोप लागेका ‘ज्योतिष’ सिमान्त केसी प्रशासनको निगरानीमा परेका छन् । उनलाई दाङ जिल्ला प्रहरीले यस्तो उपचारमा रोक लगाएको छ । केसी जिल्ला आउने भएपछि छिमेकी जिल्लाबाट समेत तीन सय भन्दा बढी मानिस जम्मा भएका थिए । तुलसीपुर–६, स्थित त्रिसिद्धेश्वरी मन्दिरमा आइतबार विहानै लामो लाइन लागेको थियो । त्यही केसीले सर्वसाधरणसित भेटघाट गरिरहेको बेला प्रहरीले उनलाई रोक लगाएको थियो ।

केही समयदेखि केसीले हात, अनुहार हेरेर, शरिर छामेर रोग निको पार्ने भन्दै सामाजिक सञ्जालमा भाइरल भएका थिए । उपचारका लागि सयौं सर्वसाधरण भीड लाग्ने गरेका थिए । उपचारका नाममा ‘भ्रम’ फैलाइएपछि उनीमाथि निगरानी बढाएको थियो । दाङ पुगेका बेला ‘भ्रम’ फैलाइएको पाइएपछि काममा रोक लगाएको इलाका प्रहरी कार्यालय तुलसीपुरका प्रमुख डीएसपी पुष्पराज मल्लले बताए । प्रतिव्यक्ति एक हजार रुपैयाँ उठाएर उपचार गर्ने गलत प्रचारप्रसार गरिएको पाइएपछि रोक लगाइएको डीएसपी मल्लले बताए । उपचारका लागि भन्दै सल्यान, रोल्पा र बाँकेबाट समेत मानिसहरु आएको उनले जानकारी दिए ।

डीएसपी मल्लले आइतबारदेखि चार दिनसम्म कार्यक्रम गर्ने तयारी गरिरहेको बेला रोकिदिएको उनले बताए । जिल्ला प्रहरी कार्यालयका डीएसपी राजनकुमार गौतमले प्रशासनलाई कुनै जानकारी नदिएर मानिसको भीड लागेको देखेपछि रोक लगाइएको जनाए । कार्यक्रममा रोक लगाएपछि केसी बाँकेको नेपालगञ्जतर्फ गएको गौतमले बताए । स्थानीय एक समूहले तुलसीपुरमा केसीको उपचारबारे प्रचार गरेको पाइएको उनले जानकारी दिए ।

Advertisement