सरकार ! मलाई काम गरिदिएन भन्ने ‘सराप’बाट बचाउनु पर्‍योः आचार्य

पब्लिक कुरा
२०८३ आश्विन ८

1060 Share

भैरहवा– राष्ट्रिय स्वतन्त्र पार्टी (रास्वपा) महामन्त्री तथा दाङ–२ का प्रतिनिधि सभा सदस्य विपिनकुमार आचार्यले आफूकहाँ सुरुवाबढुवाका लागि आउनेक्रम बढेको भन्दै चिन्ता व्यक्त गरेका छन् । उनले पार्टीको वाचापत्रअनुसार स्वायत्त सरुवा बोर्ड गठन गर्न माग गरेका छन् ।

बिहीबारको प्रतिनिधि सभा बैठकमा बोल्दै उनले काम नगरे सराप नपाइने पो हो की भन्दै चिन्ता व्यक्त गरे । उनले भने, ‘राजनीतिमा आएपछि मैले भोग्ने एउटा ठूलो प्रेसर भनेको ‘सरुवा‘बढुवा’को हो। अरु बेला सुशासन र पारदर्शिताका कुरा गर्ने साथीभाइ र इष्टमित्रहरू नै नातावाद र कृपावाद खोज्दै म कहाँ सरुवा बढुवाका लागि आइपुग्नुहुन्छ। कतिले त यति जाबो सरुवा गराउन नसक्ने भए त नाथे के नेता ? भनेर घुर्की पनी लगाउनुहुन्छ।’

आफूले सबैलाई सरुवा बढुवा विधिमै थितिमै भइराखेको छ, अब भनसुन चल्दैन भनेर भन्ने गरेको सुनाए । ‘अझ हाम्रो वाचापत्रको आठ नम्बरको बाचा देखाउँदै सरकारले चाँडै नै स्वायत्त सरुवा बोर्ड मार्फत पूर्वानुमानयोग्य, विधिमा आधारित सरुवा प्रणाली लागू गर्दैछ भनेर पनि भन्छु’, उनले भने ।

सरकारलाई यो बोर्ड चाँडै गठन गर्न उनले आग्रह गरे। ‘होइन भने यो पटकको दशैंमा आफ्नै इष्टमित्रबाट टिका र आशीर्वाद नपाइएला भन्ने पिर छ।आशीर्वादको साटो उल्टै ‘यसले हाम्रो कामै गरिदिएन’ भनेर सराप पो पाइने हो कि, त्यसैले मलाई यो सराप बाट बचाउनु पर्यो सरकार।’