लुम्बिनी प्रेस क्लबद्वारा बाढी प्रभावित पत्रकारलाई एक लाख सहयोग

Advertisement

भैरहवा– लुम्बिनी प्रेस क्लब, रुपन्देहीले रसुवास्थित भोटेकोशी नदीमा आएको बाढीबाट प्रभावित पत्रकारहरुलाई राहत स्वरुप आर्थिक सहयोग गरेको छ । क्लबले शनिबार साँझ भैरहवा दीप प्रज्ज्वल गरी दिवंगतहरुको चीरशान्तिको कामना गर्दै सहयोग रकम पनि हस्तान्तरण गरेको छ ।

Advertisement

क्लबका अध्यक्ष कमल रायमाझीका अनुसार रसुवा, नुवाकोट, धादिङ लगायतका जिल्लामा बाढीका कारण कयौं पत्रकार अझै हराइरहेका छन् । कति पत्रकारको धनसम्पत्ति सबै बाढीले बगाएको छ भने केहीको परिवार र संचारउपकरण बगाएको छ । यस्तो बेला व्यवसायिक नाताले तत्काल पत्रकारहरुलाई थोरै भए पनि सहयोग होस् भन्ने हेतुले आर्थिक सहयोग गरिएको रायमाझीले बताए ।

क्लबले नेपाल पत्रकार महासंघ केन्द्रीय समितिमार्फत् एक लाख एक हजार १ सय ११ रुपैयाँ सहयोग गरेको हो । उक्त सहयोग रकम महासंघका केन्द्रीय सदस्य रामराज पोखरेलमार्फत् हस्तान्तरण गरिएको हो । महासंघ सदस्य पोखरेलले विपद्मा परेका पत्रकारहरुको साथसयोग र राहत रकम उपलब्ध गराएकोमा क्लबलाई धन्यवाद ज्ञापन गरे । उनले विनासकारी बाढीले सयौंको ज्यान लिएको, कयौं वेपत्ता भएको र धेरैजनाको जायजेथा सबै बगेको उल्लेख गर्दै यस्तो विपत्ती सबैले आ–आफ्नो ठाउँबाट सहयोग गर्नुपर्ने जनाए ।

क्लबका महासचिव प्रकाश न्यौपानेले पत्रकारहरुले आफ्नो गक्षअनुसार सहयोग रकम जुटाएर महासंघमार्फत् पत्रकार, उनीहरुका आश्रित परिवारलाई उपलब्ध गराउने गरी हस्तान्तरण गरिएको बताए । सरकारी राहत सम्बन्धित ठाउँमा पुग्ने भए पनि तत्काल केही राहत होस् र विपत्तीमा परेका पत्रकार तथा उनीहरुका परिवारलाई सानो भए पनि सहयोग मिलोस् भनेर क्लबले सहयोग रकम हस्तान्तरण गरेको उनले बताए ।

सिद्धार्थनगर नगरपालिका प्रमुख इश्तियाक अहमद खाँनले मानवीय सेवाको काममा क्लबले खेलेको भूमिका महत्वपूर्ण रहेको जनाए । उनले विपत्तिले धेरै परिवार र आर्थिक क्षति पनि तहसनहस बनाएको जनाउँदै यस्तो बेला सबैले आफ्नो ठाउँबाट सक्दो सहयोग गर्नुपर्नेमा जोड दिए । बुद्धचोकमा आयोजित दीप प्रज्ज्वलनमा भैरहवा क्षेत्रका सामाजिक संघसंस्थाका प्रमुख तथा प्रतिनिधिहरुको सहभागिता रहेको थियो । बाढीमा परी दिवंगत स्वदेशी तथा विदेशीहरुको आत्माको चीरशान्तिको कामना गरिएको थियो ।