जसपाका तीन सांसदमाथि कारबाहीको तयारी

Advertisement

रुपन्देही–पार्टीको निर्णयविपरीत लुम्बिनी प्रदेश सरकारका मुख्यमन्त्री चेतनारायण आचार्यलाई विश्वासको मत दिएको बिषयलाई लिएर जनता समाजवादी पार्टी (जसपा) नेपालले आफ्ना तीन प्रदेशसभा सदस्यलाई कारबाहीको तयारी गरेको छ ।

Advertisement

केन्द्रीय कार्यालय बालकुमारी, ललितपुरले प्रदेशसभाका तिन सदस्यलाई लिखित स्पष्टीकरणको माग गरेको छ । पत्रमा पार्टीको स्पष्ट निर्देशनविपरीत लुम्बिनी प्रदेश सरकारको पक्षमा मतदान गरी पार्टी निर्णयको अवज्ञा गरेको विषयमा किन अनुशासनको कारबाही नगर्ने भनी प्रश्न गरीएको छ ।

पार्टीले मंगलबार प्रदेश सभा सदस्य सन्तोषकुमार पाण्डे, हेमा बेल्बासे र भण्डारीलाल अहिरलाई २४ घण्टाभित्र पुनः स्पष्टीकरण पेस गर्न निर्देशन दिएको छ । तीन जनामध्ये पाण्डे सहरी विकास, खानेपानी, ऊर्जा, जलस्रोत तथा सिँचाइ र अहिर आन्तरिक मामिला, कानुन, उद्योग तथा यातायातमन्त्री छन् ।

पार्टीले साउन ३१ गते नै लुम्बिनी प्रदेश सरकारलाई दिएको समर्थन फिर्ता लिएर विश्वासको मतको विपक्षमा मतदान गर्न निर्देशन गरेको थियो । तर, जसपाका तीन सदस्यले भदौ १ गते एमालेका मुख्यमन्त्री चेतनारायण आचार्यलाई विश्वासको मत दिएका थिए । पार्टीको निर्देशनविपरीत विश्वासको मत दिएको भन्दै भदौ २ गते ७ दिने स्पष्टीकरण सोधेको थियो । तर, पाण्डेको स्पष्टीकरण चित्तबुझ्दो र सन्तोषजनक नभएपछि तीनै जनालाई कारबाहीको तयारी गरेको हो ।

लुम्बिनी प्रदेशमा जसपा नेपालका ५ जना प्रदेशसभा सदस्य छन् । तीमध्ये ४ जनाले विश्वासको मत दिएका थिए भने एक जना अम्बिका काफ्लेले भने विश्वासको मत दिइनन् । मत दिएकामध्ये आदेशकुमार अग्रवाललाई भने पार्टीले कुनै कारबाही गरेको छैन ।

८७ सदस्यीय लुम्बिनी प्रदेश सभामा अहिले ८३ जना सदस्य छन् । सरकार बनाउनका लागि ४२ मत आवश्यक पर्छ । एमालेका २९ र नेकपाका सभामुखसहित १३ जना भए पनि एक जना विदेशमा भएकाले ११ जनाले मात्र विश्वासको मत दिएका थिए । जनमोर्चा र जसपाका ४ जनाले मत दिएकाले मुख्यमन्त्री आचार्य नेतृत्वको सरकार जोगिएको थियो ।

आफ्ना तीन सदस्यलाई जसपा नेपालले कारबाही गरेर समर्थन फिर्ता लिएमा मुख्यमन्त्री आचार्यले पुनः विश्वासको मत लिनुपर्ने हुन्छ । जसपाका पाण्डे रूपन्देही–३(१) बाट र अहिर बाँके–२(२) बाट निर्वाचित हुन् तर हेमा बेल्बासें(के.सी.) बाँकेबाटै समानुपातिकतर्फबाट निर्वाचित भएकी हुन् ।