सिद्धार्थनगरवासीलाई निःशुल्क एम्बुलेन्स सेवा

पब्लिक कुरा
२०८३ श्रावण २५

800 Share

भैरहवा–युनिभर्सल कलेज अफ मेडिकल साइन्सेस (युसीएमएस) शिक्षण अस्पताल भैरहवाले सिद्धार्थनगर क्षेत्रका गम्भिर प्रकृतिका बिरामीलाई २४ सै घण्टा निःशुल्क एम्बुलेन्स सेवा प्रदान गर्ने भएको छ ।

अस्पतालमा रेडियोलोजी विभाग स्थापना भएको रजत जयन्तीको अवसरमा उक्त अस्पतालले मुटुका विरामीलाई लक्षित गरेर ल्याएको अत्याधुनिक प्रबिधिको नयाँ एम्बुलेन्सद्वारा सिद्धार्थनगरवासीलाई यो सेवा दिने भएको हो ।

युनिभर्सल कलेज अफ मेडिकल साइन्सेसका प्रबन्ध निर्देशक खुमाप्रसाद अर्यालले रेडियोलोजी विभागको रजत जयन्तीको अवसरमा आयोजित कार्यक्रममा सिद्धार्थनगर क्षेत्रभित्र निःशुल्क एम्बुलेन्स सेवा प्रदान गर्ने घोषणा गरे । ‘नगरभित्र एम्बुलेन्स आवश्यक परेको घर घरमा पुगेर २४ सै घण्टा निःशुल्क सेवा उपलब्ध गराइने छ’ अर्यालले भने ।

नेपाल सरकारबाट प्राप्त छुट सुविधासहित ३३ लाख रुपैयाँको लागतमा ल्याइएको उक्त एम्बुलेन्समा भ्यान्टिलेटर र मोनिटर सहितको सेवा विरामीलाई उपलब्ध छ ।

अस्पतालका प्रमुख कार्यकारी अधिकृत अजयकुमार पीएसले तत्कालकालागि निःशुल्क यो सेवा सिद्धार्थनगर क्षेत्रमा गम्भिर अवस्थाका विरामीलाई अस्पताल ल्याउन र घर लैजानकालागि लागू गरिएको बताए ।

रेडियोलोजी विभागको रजत जयन्तीको अवसरमा अस्पतालमा अत्याधुनिक १२८ स्लाइस सिटी स्क्यान मेसिनपनि सञ्चालनमा ल्याइएको छ ।