बैशाखमा रूपन्देही प्रहरीमा १८६ मुद्दा दर्ता

Advertisement

भैरहवा–जिल्ला प्रहरी कार्यालय, रुपन्देहीमा गत वैशाख महिनामा विभिन्न प्रकृतिका कुल १८६ वटा मुद्दा दर्ता भएका छन् । रुपन्देही प्रहरीले अपराध नियन्त्रण, अनुसन्धान र फैसला कार्यान्वयनको क्षेत्रमा उल्लेख्य सफलता हासिल गरेको दाबी समेत गरेको छ ।

Advertisement

प्रहरीले सार्वजनिक गरेको मासिक प्रगति प्रतिवेदन अनुसार वैशाख महिनाभर १९४ जना प्रतिवादीहरूलाई पक्राउ गरी कानुनी दायरामा ल्याइएको छ । दर्ता भएका मुद्दामध्ये सबैभन्दा बढी सामाजिक अपराध र संगठित तथा आर्थिक अपराधसँग सम्बन्धित छन् । जघन्य/गम्भीर अपराध अन्तर्गत ८१ वटा, आर्थिक अपराध अन्तर्गत ४६ वटा र महिला तथा बालबालिका सम्बन्धी अपराध अन्तर्गत १२ वटा मुद्दा दर्ता भएका छन् ।

सामाजिक अपराध ४९, संगठित तथा आर्थिक अपराध ४६, ज्यान सम्बन्धी अपराध २४, आत्महत्या २३, सवारी सम्बन्धी अपराध १७, चोरी १५, महिला बालबालिका सम्बन्धी अपराध १२ वटा छन् ।

वैशाख महिनामा मात्रै ९० जना फरार प्रतिवादीहरू पक्राउ परेका छन् । पक्राउ परेका प्रतिवादीहरूबाट कुल ६३ वर्ष २ महिना १२ दिन कैद सजाय भुक्तानका लागि अदालत बुझाएपछि कारागार चलान गरिएको छ भने उनीहरूबाट ५८ लाख ३४ हजार ७४५ रुपैयाँ जरिवाना समेत असुल गरिएको छ ।

वैशाख महिनामा घरेलु हिंसा र छिमेकीसंगको झगडा (ठाडो निवेदन) गरी कुल १२२ वटा उजुरी दर्ता भएका थिए । जसमध्ये अधिकांश घटनालाई प्रहरीले आपसी सहमति र मिलापत्रमार्फत टुङ्ग्याएको छ । घरेलु हिंसातर्फ दर्ता भएका ८४ उजुरीमध्ये ७६ वटामा मिलापत्र गराइएको छ ।

घरेलु हिंसामा ८० जना पीडित र ७८ जना पीडक १९ देखि ५९ वर्ष उमेर समूहका छन् । ज्येष्ठ नागरिक (६० वर्षमाथि) तर्फ घरेलु हिंसामा ३ जना पीडित र ६ जना पीडक रहेका छन् । जिल्ला प्रहरी कार्यालय रुपन्देहीले जिल्लामा शान्ति सुरक्षा कायम गर्न, अपराध अनुसन्धानलाई सुदृढ बनाउन र पीडितलाई तत्काल न्याय दिलाउन आफ्नो संयन्त्रलाई थप प्रभावकारी रूपमा परिचालन गरिरहेको उल्लेख गरेको छ ।