मुद्दा मिलाइदिने भन्दै रकम असुली गर्ने पक्राउ

पब्लिक कुरा
२०८३ बैशाख २१

2230 Share

नेपालगन्ज–प्रहरी अनुसन्धानमा रहेका मुद्दाहरू मिलाइदिने भन्दै रकम असुली गर्ने एक जनालाई बाँकेको इलाका प्रहरी कार्यालय कोहलपुरले पक्राउ गरेको छ ।

जिल्ला प्रहरी कार्यालय बाँकेका अनुसार, कोहलपुर नगरपालिका–१२, चप्परगौडी निवासी करिब ४० वर्षीय काशीराम थारूलाई मुद्दा मिलाइदिने बहानामा रकम असुल गरेको आरोपमा प्रहरीले पक्राउ गरेको हो ।

जिल्ला प्रहरी कार्यालय बाँकेका प्रहरी प्रवक्ता एवं प्रहरी नायब उपरीक्षक दीपक पातलीले विभिन्न मिति र समयमा विभिन्न कसूरमा संलग्न व्यक्तिहरू विरुद्ध प्रहरी अनुसन्धान प्रक्रियामा रहेका मुद्दाहरू मिलाइदिने भन्दै थारुले प्रतिवादीका परिवारसँग रकम लिएको आरोपमा नियन्त्रणमा लिइएको बताए ।

‘आपराधिक लाभ लिन नहुने’ कसूरमा उनलाई बाँके जिल्ला अदालतबाट पाँच दिनको म्याद लिई थप अनुसन्धान कार्य भइरहेको पातलीले जनाए ।