अन्तिम वर्षमा सिद्धबाबा सुरुङमार्गको काम सेलायो

Advertisement

भैरहवा– निर्माण सकिन एक वर्ष बाँकी रहेका बेला सिद्धार्थ राजमार्ग अन्तर्गत सिद्धबाबा सुरुङमार्ग निर्माणको काम सेलाएको छ । अहिलेसम्म उक्त सुरुङ मार्गको ६७.२७ प्रतिशत भौतिक प्रगति भएको छ ।

Advertisement

आयोजनाका अनुसार २०८३ चैत्र ८ गतेसम्म निर्माण पूरा गर्ने सम्झौता छ । यस आयोजना अन्तर्गत सुरुङ ‘ब्रेक थ्रु’ सम्म तीव्र गतिमा काम भएको थियो । अहिले काम सुस्त भएको हो । पाल्पाको तिनाउ–३, दोभानस्थित बुटवल–पाल्पा खण्डमा सिद्धबाबामा सुरुङमार्ग निर्माण भइरहेको छ । यसका सम्पूर्ण संरचना डिजाइन, निर्माण तथा मर्मतको चाइना स्टेट कन्स्ट्रक्सन इन्जिनियरिङ कर्पोरेसनले ठेक्का लिएको छ । सुरुङ मार्ग अन्तर्गत मुख्य टनेलको इन्भर्ट र लाइनिङको काम सकिएको छ ।

यो टनेल १ हजार १ सय २६ मिटर छ । सिद्धबाबा सुरुङमार्ग आयोजना प्रमुख नवराज बास्तोलाका अनुसार पछिल्लो समयमा आवश्यक कामहरू भइरहेको छ । सुरुङको उत्तर र दक्षिणतर्फको ३७ मिटर पोर्टलको काम अहिले भइरहेको छ । मुख्य सुरुङ अन्तर्गत चौडाइ ९.९ मिटर, उचाइ ११.५ मिटर हुनेछ । दुई लेनको सडकमा जेट फ्यान १५ वटा रहनेछ । डिजाइनको आयु भने सय वर्ष रहेको योजना कार्यालयका प्रमुख बास्तोलाले बताए ।

६० किलोमिटर प्रतिघण्टा गतिमा सवारी चलाउन सकिने सुरुङमा दुईतर्फी, दुई लेन हुनेछ । ब्लाष्टिङ र ड्रिलिङ गरिएको सुरुगको तीन वटा बाइपास छन् । काम सुरु भएको मितिले १ हजार ८२५ दिनमा काम सम्पन्न गर्नुपर्ने हो । यो सुरुङको वारेन्टी, सञ्चालन तथा मर्मत सम्हार कार्य पनि ५ वर्षको सम्झौतामा उल्लेख छ ।

तर लुकेका दोष दायित्व अवधि भने १० वर्षको हुनेछ । नेपाल सरकारको आफ्नै स्रोतबाट सुरुङ निर्माण भइरहेको हो । योजना अन्तर्गत सिद्धार्थ राजमार्गको २ हजार ३ सय ९८ मिटर सडक सुधार गर्नुपर्ने छ । मुख्य सडक ९०४ मिटर, सुरुङको क्षेत्र ९ सय ४४ मिटर, मुख्य सडक थप ५५० मिटर सडक सुधार गर्ने सम्झौतामा छ । पछिल्लो पटक चैत १८ गतेसम्म सिद्धबाबा सुरुङमार्गको काम ६५.२७ भौतिक र ५८.६५ प्रतिशत पुगेको आयोजना कार्यालयले जनाएको छ । तर, पछिल्लो समय काममा ढिलाई भएको आयोजनाले जनाएको छ ।