एसइइ परीक्षाको पहिलो दिन रूपन्देहीमा शान्तिपूर्ण रुपमा सम्पन्न

पब्लिक कुरा
२०८२ चैत्र १९

3440 Share

भैरहवा–एसइइ परीक्षाको पहिलो दिन बिहीवार रूपन्देहीका सवै परीक्षा केन्द्रमा शान्तिपूर्ण रुपमा सम्पन्न भएका छन् ।

शिक्षा विकास तथा समन्वय इकाइ कार्यालय रुपन्देहीले एसइइ परीक्षाको पहिलो दिन रूपन्देहीमा कोहीपनि निष्कासन नभएको र कुनैपनि अप्रिय घटना नभएको जनाएको छ । दिउसो २ बजे भित्रै सवै परीक्षा केन्द्रमा उत्तरपुस्तीका जांच्ने कामपनि सुरु भएको छ । ‘एसइइ परीक्षाको पहिलो दिन बिहीवार रूपन्देहीका सवै परीक्षा केन्द्रमा शान्तपूर्वक परीक्षा सम्पन्न भएको छ’ रूपन्देहीका शिक्षा विकास समन्वय इकाइ प्रमुख बिष्णु प्रसाद पन्थीले भने ।

रूपन्देहीमा १ सय ७६ वटा सामुदायिक र १ सय ६९ वटा संस्थागत बिद्यालयबाट गरी कुल २१ हजार ५ सय ४५ जना परीक्षार्थी छन् । जसमध्ये जिल्ला कारागार र बाल सुधार गृहमा रहेका विभिन्न जिल्लाका १८ जना परीक्षार्थी छन् । उनीहरु सवैले भैरहवा नमुना उच्च मावि परीक्षाकेन्द्रबाट परीक्षा दिएका छन् ।

उनका अनुसार, रूपन्देहीमा एसइइ परक्षिाका लागि ५९ वटा परीक्षा केन्द्र रहेको र सवै केन्द्रबाट उत्तरपुस्तिका जांचिने र एउटा बिषयको उत्तरपुस्तिका जांच गर्न २ सय भन्दा धेरै बिषयगत शिक्षकको परिचालन हुने छ । ‘परीक्षार्थी संख्याको आधारमा हरेक परीक्षा केन्द्रमा कापी जांच गर्न आवश्यक पर्ने बिषयगत शिक्षकको संख्यामा एकरुपता हुन सक्दैन’ पन्थीले भने, ‘जिल्ला भरी प्रत्येक बिषयको कापी जांच गर्न २ सय भन्दा धेरै शिक्षकको आवश्यकता पर्ने अनुमान छ ।’

एसइइ परीक्षा सञ्चालनका लागि रूपन्देही जिल्लामा सुरक्षाकर्मी सहित २ हजार ५ सय ४२ जना कुल जनशक्तीको परिचालन गरिएको छ । शिक्षा विकास तथा समन्वय इकाइ कार्यालय रुपन्देहीका अनुसार, एसइइ परीक्षा सञ्चालनका लागि केन्द्राध्यक्ष ५९ जना, सहायक केन्द्राध्यक्ष १ सय १८, निरीक्षक १ हजार ६७, सहयोगी १ सय १८, परीक्षा सहायक १ सय १८ र सुरक्षाकर्मी १ हजार ६२ जनाको जनशक्ति परिचालन गरिएको हो ।

उत्तरपुस्तीका कापी जांच गर्नका लागि आफ्नो केन्द्रमा आवश्यक पर्ने बिषयगत शिक्षकको व्यवस्थापन गर्न सम्बन्धित केन्द्राध्यक्षलाइ नै अधिकार दिइएको र प्रत्येक तीन–तीन दिनमा परीक्षाकेन्द्रमा कापी जांच गरि शिक्षा बिकास तथा समन्वय इकाइ कार्यालय तथा नजिकको सुरक्षा निकायमा उत्तरपुस्तीका कापी बुझाउनु पर्ने पन्थीले बताए । केन्द्राध्यक्षले एसइइ परीक्षा संचालन सम्बन्धि निर्देशिका अनुरुप उत्तरपुस्तीका जांच गर्नका लागि बिषयगत शिक्षकको व्यवस्था गर्नु पर्ने छ ।

पन्थीका अनुसार, हरेक तीन–तीन दिनमा नजिकको सुरक्षा निकायमा बुझाइएको उत्तरपुस्तीका परीक्षा सकिएपछि शिक्षा बिकास तथा समन्वय इकाइ कार्यालयले ल्याउने छ । तर, हरेक तीन–तीन दिनमा सम्बन्धित परीक्षाकेन्द्रले परीक्षार्थीको मार्क स्लिपभने समन्वय इकाइ कार्यालयमा पठाउनु पर्ने छ ।