निर्माण व्यावसायीको नेतृत्व हुँदै मञ्जुको संसदीय यात्रा

Advertisement

भैरहवा– जिल्लामा निर्माण व्यावसायीको नेतृत्व गरिरहेकी रुपन्देहीकी ५० वर्षीय मन्जु ज्ञवाली भुसालले संसदीय यात्रा तय गरेकी छन् । बुटवल–११ की भुसाल राष्ट्रिय स्वतन्त्र पार्टी (रास्वपा) बाट समानुपातिक तर्फ निर्वाचित भएर प्रतिनिधिसभा सदस्य बनेकी हुन् । पारिवारिक रुपमा प्राप्त राजीतिक ज्ञानले उनलाई राजनीतिमा आकर्षित गरेको हो ।

Advertisement

उनका बुवा मेघनाथ ज्ञवाली २०४६ अघि उपप्रधानपञ्च र बहुदल आएपछि अर्घाखाँचीको चिदिका गाविस उपाध्यक्ष भएका थिए । उनका हजुरबुवा र आमा पनि पञ्चायतकालमा तत्कालीन राजनीतिमा आवद्ध थिए । आफ्ना पिता पुर्खाको प्रेरणाले आफू राजनीतिमा जोडिएको मञ्जुले बताइन् । मुलुकमा बहुदल आएपछि २०५१ सालमा नेविसंघको सदस्यता लिएकी थिइन् । उनी तरुण दल, कांग्रेस गाउँ समिति सचिव हुँदै २०५९–२०६० सालमा कम्युनिष्ट पार्टीमा प्रवेश गरेकी थिइन् ।

२०७४ मा माओवादी र एमालेको एकतापछि उनी नेकपाबाट एमाले बनिन् । २०८२ भदौ २३ र २४ को जेनजी प्रदर्शनपछि एमाले छाडेकी उनी दुई महिनाअघि रास्वपा प्रवेश गरेर समानुपातिक सांसदको अवसर पाएकी हुन् । सामाजिक अभियन्ता हुनुका साथैं दर्जनौं सघंसंस्थाको नेतृत्वदायी भूमिकामा पनि जोडिएकी छन् ।

मुलुकका ७७ जिल्ला मध्ये रुपन्देहीको निर्माण व्यवसायी संघको जिल्ला अध्यक्ष बन्ने उनी मात्र एक्लि महिला हुन् । निर्माण व्यवसायी महासंघको पूर्वकेन्द्रीय सदस्य, लुम्बिनी प्रदेश पूर्वउपाध्यक्ष पनि हुन् । जेसिज २०१६ को महिला अध्यक्ष, २०१७ को राष्ट्रिय कोओर्डिनेटरदेखि घरेलु तथा साना उद्योग महासंघकी महिला जिल्ला सभापति, चेम्बर अफ कमर्स लुम्बिनी प्रदेश सदस्य र पश्चिम नेपाल ट्रक व्यवसायी समिति पूर्व सल्लाहकार समेत भएकी मञ्जुले १२ कक्षासम्मको अध्ययन गरेकी छन् ।

श्रीमान् नारायणप्रसाद भुसालको साथ, सहयोगले राजनीतिक नेतृत्वको नीति निर्माण तहमा पुग्न सफल भएको बताउने भुसालले प्रतिनिधिसभामा सुकुम्बासी समस्या समाधानका लागि प्राथमिकताका साथ ध्यान दिने, जेनजीका सपना पूरा गर्ने, रूपन्देही, गुल्मी र अर्घाखाँचीका निर्माण क्षेत्रका समस्या, विकासका पूर्वाधार, रोजगारी स्थापना, उद्योग क्षेत्रको विकासका लागि काम गर्ने संकल्प गरेकी छन् ।