लुम्बिनी प्रदेशबाट सांसद चुनिए ४० मुनिका ११ युवा

Advertisement

भैरहवा– २६ निर्वाचन क्षेत्र रहेको लुम्बिनी प्रदेशका ११ निर्वाचन क्षेत्रमा ४० वर्ष मुनिका युवा प्रतिनिधि सभा सदस्यमा निर्वाचित भएका छन् । ११ मध्ये सबैभन्दा बढी ४० मुनिका युवा निर्वाचित हुने जिल्ला रुपन्देही बनेको छ । जिल्लाको क्षेत्र नम्बर १, २, ४ र ५ मा ४० मुनिका युवा सांसद चुनिएका छन् ।

Advertisement

प्रदेशमा ४० मुनिका निर्वाचित युवा सांसदहरुमध्ये १० जना राष्ट्रिय स्वतन्त्र पार्टी (रास्वपा) बाट हुन् भने एकजना नेपाली कांग्रेसका छन् । यसअघि यी सबै निर्वाचन क्षेत्रमा ५० वर्ष माथिका नेताहरु निर्वाचित हुँदै आएका थिए । निर्वाचित युवाहरु सबैजनाको पहिलो पटक संसदीय यात्रा हो ।

रुपन्देही–१ मा रास्वपाका ३५ वर्षीय इन्जिनियर सुनिल लम्साल निर्वाचित हुँदा क्षेत्र नम्बर २ मा २८ वर्षीय अधिवक्ता सुलभ खरेल, ४ मा ३६ वर्षीय कन्हैया बनिया र ५ मा पनि रास्वपाकै ३८ वर्षीय युवा तौफिक अहमद खाँन निर्वाचित भएका छन् । यस्तै, दाङ–२ मा रास्वपाका सहमहामन्त्री ३९ वर्षीय विपिनकुमार आचार्य र दाङ–३ मा रास्वपाकै ३८ वर्षीय युवा कमल सुवेदी विजयी हुँदै संसदीय यात्रामा प्रवेश गरेका छन् ।

बाँके–३ मा रास्वपाका ३५ वर्षीय खगेन्द्र सुनार विजयी हुँदा पाल्पा–१ मा नेपाली कांग्रेसका ३८ वर्षीय युवा सन्दीप रानाले संसदीय राजनीतिमा पाइला टेकेका छन् । यसैगरी गुल्मी–१ बाट रास्वपाका ३४ वर्षीय सागर ढकालले जित निकाल्दा अर्घाखाँचीबाट रास्वपाकै ३७ वर्षीय हरिप्रसाद भुसाल विजयी भएका छन् । प्यूठानबाट युवा अर्थशास्त्री समेत रहेका ३१ वर्षीय सुशान्त बैदिकले बाजी मारेका छन् । बैदिक पनि रास्वपाबाटै निर्वाचित भएर संसदीय यात्रा तय गर्ने युवा हुन् ।

विगतमा ५० कटेका नेताहरुले जित्दै आएका लुम्बिनी प्रदेशका यी क्षेत्रहरुमा यसपटक मतदाताले युवा उम्मेदवारलाई अनुमोदन गरेर परिवर्तनको संकेत दिएका छन् । निर्वाचित युवाहरुले आ–आफ्नो क्षेत्रमा अधिकांश हेबीवेट नेताहरुलाई हराएर संसदीय यात्रा तय गरेका हुन् ।