उच्च अदालत बुटवलमा रवि र छविको मुद्दामा सुनुवाइका लागि पेसी तोकियो

Advertisement

बुटवल– राष्ट्रिय स्वतन्त्र पार्टी (रास्वपा) का सभापति रवि लामिछाने र तत्कालीन गोर्खा मिडियाका सञ्चालक पूर्वडीआईजी छविलाल जोशीको मुद्दाको सुनुवाइका लागि पेसी तोकिएको छ । सहकारी ठगी र सङ्गठित अपराध अभियोगमा थुनामा रहेका उनीहरुको उच्च अदालत तुलसीपुर बुटवल इजलासमा पेसी तोकिएको हो ।

Advertisement

अदालतका सूचना अधिकारी रामबहादुर कुँवरले आज मुद्दाको पेसी तोकिएको बताए । बुटवलको सुप्रिम सहकारी ठगीको मुद्दामा पुर्पक्षका लागि थुनामा रहेका लामिछानेले सहकारीमा अपचलन गरेको आफ्नो भागको बिगो रकम दाखिल गर्दा पनि रुपन्देही जिल्ला अदालतका न्यायाधीश नारायण सापकोटाको इजलासले साउन २६ गते रिहा गर्न अस्वीकार गरेको थियो ।

जिल्लाको आदेशविरुद्ध लामिछानेले गत भदौ ९ गते उच्च अदालतमा निवेदन दर्ता गराएका थिए । यसअघि सहकारी ठगीको मुद्दा पनि लगाउमा राखेर हेरिएको छ। गत हप्ता न्यायाधीश ओमप्रकाश अर्याल र तेजनारायण पौडेलको इजलासले रविको मूल मुद्दाको प्रतिलिपि झिकाउने आदेश दिएको थियो ।

बुटवलको सुप्रिम सहकारी ठगीमा रविसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरेर अभियोगपत्र दायर गरिएको छ । तर, लामिछानेले त्यसको चार भागमध्ये आफ्नो भागको एक भाग बराबर बिगो दाखिला गरेको कागजात पेस गरेका थिए । लामिछानेले २ करोड ७४ लाख ८४ हजार रुपैयाँको बैंक जमानत निवेदनसाथ पेस गरेका थिए ।