रूपन्देही–३ उपनिर्वाचनः उम्मेदवार टुंग्याएका दलहरू प्रचारमा

पब्लिक कुरा
२०८२ भाद्र २०

492 Share

भैरहवा– रुपन्देही–३ मा कार्तिक १७ गते हुने प्रतिनिधिसभा सदस्य उपनिर्वाचनका लागि तीन दलले उम्मेदवार टुंगो लगाएर प्रचारमा जुटेका छन् । राष्ट्रिय स्वतन्त्र पार्टी (रास्वपा), राप्रपा नेपाल र जनमतले उम्मेदवार तय गरिसकेका छन् । उम्मेदवार तय गरेका दल अहिले भेटघाट र घरदैलोमा केन्द्रित छन् । यी सँगै स्वतन्त्र उम्मेदवारी दिएका व्यक्ति समेत प्रचारमा जुटेका छन् ।

रास्वपा उम्मेदवार डा. लेखजंग थापाले बिहीबारबाट भेटघाट थालेका छन् । यस क्रममा उनी पार्टी कार्यकर्तासित आन्तरिक भेटघाटमा व्यस्त छन् । साथै नागरिकको घरदैलोमा पुगेर मत मागिरहेका छन् । राप्रपा नेपालका उम्मेदवार अर्जुन थापाले पनि सामाजिक सञ्जालका साथै मतदाता भेटलाई तिव्रता दिएका छन् । जनमत पार्टीबाट उम्मेदवार बनेका धनिराम चौधरीले दुई महिना अघिदेखि तयारीमा थिए । अहिले उनी खुलेर मतदाता समक्ष पुग्न थालेका छन् । यस्तै, राष्ट्रिय जनमोर्चाका बद्रे आलम पनि मत माग्न व्यस्त छन् ।

यो सँगैं उपनिर्वाचन मिति नजिकिएसँगै दलहरू क्षेत्र आफ्नो कब्जामा पार्न आन्तरिक रणनीतिमा जुटेका हुन् । त्यसका लागि केही दलले तालमेल गर्ने तयारी गरेका छन् भने केहीले एकल उम्मेदवारका लागि बलियो उम्मेदवार खोजिरहेका छन् । २०७९ सालको निर्वाचनमा राप्रपाका नेता दीपक बोहरा निर्वाचित भएका थिए । तर उनको निधन भएपछि यो क्षेत्रमा उपनिर्वाचन हुन लागको हो । नेपाली कांग्रेस, नेकपा एमाले र नेकपा माओवादी केन्द्र लगायतका दलले उम्मेदवार छनोटका लागि आन्तरिक तयारी गरे पनि नाम सार्वजनिक गरिसकेका छैनन् ।

कमल थापा नेतृत्वको राप्रपा नेपालले अर्जुन थापालाई उम्मेदवार बनाएको छ । राप्रपा नेपाल लुम्बिनी प्रदेशले जिल्लाबाट सिफारिस भएका ३ जनामध्ये थापालाई सिफारिस गरेपछि उनी नै उम्मेदवार भएको पार्टीले जनाएको छ । उम्मेदवारका लागि सिफारिस थापा राप्रपा नेपालको रुपन्देही जिल्ला अध्यक्ष हुन् । सीके राउत नेतृत्वको जनमतले पनि आफ्नो उम्मेदवार टुङ्ग्याएको छ । जनमतले चौधरीलाई उम्मेदवार बनाउने निर्णय गरेको हो ।

यस्तै, स्वतन्त्र उम्मेदवारी घोषणा गरेका भैरहवाका अजयकुमार गुप्ता, बुटवलका लेखनाथ गैरे, किरण विकले पनि मतदाता भेटघाट गरिरहेका छन् । यस्तै, काठमाडौंका मेयर बालेन शाहका सल्लाहकार सन्तोष गिरी पनि मतदाता भेटिरहेका छन् ।