मुस्लिम समुदायमा १५००औं मोहम्मद जन्मजयन्तीको रमझम (फोटो फिचर)

पब्लिक कुरा
२०८२ भाद्र २०

744 Share

भैरहवा– इस्लाम धर्मका प्रवर्तक पैगम्बर हजरत मोहम्मदको १५००औं जन्मजयन्तीका अवसरमा इस्लाम धर्मावलम्बीले विभिन्न कार्यक्रम गरेका छन् । रुपन्देहीका विभिन्न पालिकाहरु बिहानैदेखि रमझम छ । गाडीमा ठूलाठूला साउण्ड बक्स राखेर मुस्लिम समुदायले पैदल र मोटरसाइकल र्याली निकालेका छन् । मुस्लिम समुदायको झण्डासँगै राष्ट्रिय झण्डा समेत फहराउँदै उनीहरु र्यालीमा सहभागी छन् ।

मोहम्मद जन्मज्यन्तीलाई यो समुदयाले विशेष रुपमा मनाउँदै आएका छन् । जिल्लाको विभिन्न क्षेत्रका दर्जनौं मदरसाहरुबाट आएका र्यालीहरु रुपन्देही सदरमुकाम भैरहवामा एकठ्ठा भई आफ्नो इस्लामिक झण्डासहित नेपालको झण्डा पनि बोकी र्यालीमा सहभागी भएका छन् । नेपालप्रतिको माया देखाउँदै मुस्लिम समुदायहरुले आफ्नो इस्लामिक झण्डासँगै नेपालको झण्डा पनि फहराएका हुन् ।

इस्लाम परम्पराको हिजरी संवत् अनुसार रवि–उल–अव्वल महिनाको १२ तारिख धर्म प्रवर्तक हजरत मोहम्मद पैगम्बर सल्लाह अलै वसल्लामको जन्मदिन मानिन्छ । इस्लाम धर्मवलम्बी यस महिनाको ९ तारिखदेखि नै उत्सवमय वातावरणमा ‘मोहम्मद डे’ अर्थात् मोहम्मदको जन्मदिन मनाउँछन् ।

पर्वका अवसरमा मुलुकभरका मुस्लिम बस्ती निकै चहलपहल बनेका छन् । मुस्लिम धर्मावलम्बी बसोबास बाहुल्यताका बस्तीमा अहिले बस्ती सरसफाइ, रङरोगन र जताततै झिलीमिली बत्ती जडान गरिएका छन् ।

आज बस्तीबस्तीमा इस्लाम धर्मावलम्बीले सद्भाव र्यालीको आयोजना गरेका छन् । सबैप्रति उच्च सम्मान, आपसी एकता, परोपकार र अहिंसा यस पर्वको मुख्य सन्देश मानिन्छ । पर्वको महत्व नै एकता र आपसी सद्भाव हुने सिद्धार्थनगर नगरपालिकाका प्रमुख इश्तियाक अहमद खाँले जानकारी दिए ।

पर्वमा एकाबिहानै नुहाइधुवाइ गरेर विशेष नमाज (प्रार्थना) गरेपछि इस्लाम धर्मावलम्बी अल्लाह (ईश्वर) को पुकारा गर्दै हजरत मोहम्मद पैगम्बरका उपदेश सुन्छन् । ईद मिलाद नवी पनि भनिने यो पर्वमा कुरान सुन्ने, सामूहिक भोज खाने र आपसमा पर्वको शुभकामना साटासाट गर्ने चलन रहेको उनले बताए ।

पर्वमा मिष्टान्न परिकार खाने खुवाउने चलन छ । यो पर्वले सबैप्रति रहम (करुणा) गर्न र संसारभरिका मानवजातिसम्म हजरत मोहम्मद पैगम्बरको शुभ सन्देश पुर्याउँदै धार्मिक सद्भावका लागि अपिल गरिनु मुख्य पक्ष भएको उनले बताए । यसै अवसरमा रुपन्देहीका विभिन्न पालिकाले आज विदा समेत दिएका छन् ।

सन् ५७१ अर्थात् आरबी पात्रो रबीउल औवल महिनाको १२ तारिखका दिन मुस्लिम समुदायका धर्म गुरु पैगम्बर मोहम्मद साहबको साउदी अरबको मक्का शरिफमा जन्म भएको थियो । भैरहवाको बेलहिया, मेउडिहवा, गल्लामण्डी, बुद्धचोक, बुटवल, लुम्बिनी लगायतका ठाउँमा र्याली निकालिएको छ ।