February 8, 2025, Saturday
२०८१ माघ २७

सिद्धार्थनगरमा जनप्रतिनिधिबीच टकरावः बोर्ड बैठक बस्न सकेन, हिउँदे अधिवेशन अनिश्चित

भैरहवा– रुपन्देहीको सिद्धार्थनगर नगरपालिकामा जनप्रतिनिधिबीच टकराव हुँदा पछिल्ला तीन नगर कार्यपालिका बैठक (बोर्ड बैठक) बस्न सकेको छैन । जसले गर्दा हिउँदे अधिवेशन नै अनिश्चित भएको छ । अधिवेशनका लागि बोर्ड बैठकले एजेण्डा तय गर्नुपर्ने हुन्छ । तर, पटक–पटक बोलाइएको बोर्ड बैठक बस्न नसक्दा अधिवेशन कहिले गर्ने भन्नेबारे टुंगो नलागेको नगर उपप्रमुख उमा अधिकारीले बताइन् । कानूनतः यही पुस २४ गतेसम्म हिउँदे अधिवेशन बस्नुपर्छ ।

Advertisement

केही समय अघि तय गरिएको बोर्ड बैठकमा नगर प्रमुख, उपप्रमुख, वडा नं. १ का वडाध्यक्ष र प्रमुख प्रशासकीय अधिकृत बाहेक अन्य कोही उपस्थित भएनन् । कहाँसम्म भने नगर प्रमुख निकट मानिएका काँग्रेसबाट निर्वाचित वडाध्यक्ष समेत उपस्थित नहुँदा बोर्ड बैठक नै बस्न सकेन् ।

पटक–पटक आह्वान गरिएको बोर्ड बैठक बस्न नसक्दा योजना कार्यान्वयन र बजेट खर्चमै समस्या निम्तिन थालेको नगरपालिकाका एक अधिकृत बताउँछन् । ‘जनप्रतिनिधिको टकरावले सास्ती जनतालाई भएको छ । योजना कार्यान्वयन नहुँदा बजेट फ्रिज हुने अवस्था आउन थालेको छ’, ती अधिकृतले भने, ‘यसको दोषी जनप्रतिनिधिहरु हुन् । यो कुरा जनताले बुझ्न जरुरी छ ।’ उनले काम नगर्ने तर कर्मचारीलाई दोष थुपारेर उम्किने प्रचलन यहाँका जनप्रतिनिधिमा रहेको जनाए ।

उपप्रमुख अधिकारीले नगर प्रमुख इश्तियाक अहम्मद खाँकै कारण पटक–पटक बोर्ड बैठक स्थगित हुँदै आएको जनाइन् । ‘प्रमुखले योजनाहरुमा समावेसिता गर्नुभएको छैन । कुनै पनि योजनामा सिरियस हुनुहुँदैन’, उनले भनिन्, ‘यसले गर्दा पनि एमाले, राप्रपा मात्रै होइन् उहाँकै पार्टी काँग्रेसबाट निर्वाचित जनप्रतिनिधिहरु पनि सन्तुष्ट हुनुहुन्न ।’

उनले मंसिर अन्तिम र पुस लागेपछि दुईपटक बस्ने भनिएको बोर्ड बैठक वडाध्यक्षहरु उपस्थित नहुँदा स्थगित गरिएको जनाइन् । ‘प्रमुखलाई भेट्नै मुस्किल पर्छ’, उनले पब्लिक कुरासँग भनिन्, ‘समय नदिने, अन्य जनप्रतिनिधिसँग भेट्न नखोज्ने, भेट भइहाले हुन्छ–हुन्छ भन्ने तर काम नगर्ने प्रवृत्तिले समस्या निम्तिरहेको छ ।’ अधिकारीले नगरमा प्रदेश र संघबाट योजना ल्याउन पहल नगर्ने, आफ्नो पहलमा ल्याएका योजनाहरु पनि स्वीकृति नगर्ने प्रवृत्ति प्रमुखसँग रहेको बताइन् ।

सिद्धार्थनगर वडा नं. १ का वडाध्यक्ष उज्ज्वल पोखरेलले जनप्रतिनिधिहरु पार्टीगतरुपमा विभाजित हुँदा बैठक बस्न नसकेको जनाए । ‘पुस २४ भित्र हिउँदे अधिवेशन गर्नुपर्छ तर यहाँ बोर्ड बैठकसमेत बस्न सकेको छैन’, उनले भने, ‘प्रमुख र उपप्रमुखबीच आन्तरिक विवाद हुँदा समस्या भइरहेको छ । तर, छिटो समस्या समाधान गरेर हिउँदे अधिवेशन आह्वान गर्नुपर्छ भन्ने हाम्रो माग छ ।’

उनले समयमै हिउँदे अधिवेशन नभए सडक बोर्डबाट सिद्धार्थनगरमा परेको बजेट फ्रिज हुने जनाए । ‘कुनै पनि बहानामा जनताको काम रोकिनुहुन्न, बजेट फ्रिज र योजना कार्यान्वयनमा समस्या आउनुहुन्न’, उनले भने, ‘हिउँदे अधिवेशनबाट धेरै कुराहरु संशोधन गर्नुपर्नेछ । यसमा प्रमुख, उपप्रमुख लगायत सबै जनप्रतिनिधि सिरियस हुन जरुरी छ ।’

नगरमा सुरुमा राप्रपा र एमालेबीच गठबन्धन थियो । यसपछि राप्रपा र काँग्रेसबीच गठबन्धन भयो । अहिले काँग्रेस र एमालेबीच गठबन्धन छ । तर, प्रमुख र उपप्रुमख मिल्न नसक्दा धेरै योजना कार्यान्वयनमा समस्या भइरहेको वडाध्यक्षहरु बताउँछन् ।

सिद्धार्थनगर–५ का वडाध्यक्ष पुरनप्रसाद श्रेष्ठले प्रमुख, उपप्रमुख नमिल्दा सबै काम अस्तव्यस्त भएको बताए । उनले बोर्ड बैठक बस्ने भनिए पनि विभिन्न कारणले बस्न नसकेको जनाए । ‘सुरुमा बोर्ड बैठक बस्ने भन्दा उपप्रमुखले धेरै वडाध्यक्षहरुलाई बैठकमा नजान भन्नुभयो, अहिले उहाँले बोलाउँदा पनि वडाध्यक्षहरु आउनुभएको छैन’, उनले भने, ‘अहिले आफ्नो सेटिङ मिलेपछि बैठकमा आउनु भन्नुभएको छ । तर साथीहरु के कारणले जानुभएको छैन, मलाई थाहा छैन ।’

वडाध्यक्ष श्रेष्ठले वडा नं. १० स्थित सूर्यदेव माविको जग्गा लिजमा दिने विषयमा विवाद भएको जानकारीमा आएको बताए । ‘स्कूलको जग्गा लिजमा दिन हुँदैन भन्ने हाम्रो आवाज थियो, तर दिनुपर्छ भन्ने उपप्रमुख लगायतको थियो । यही विषयले विवाद सिर्जना भएको हो’, उनले भने, ‘जसले गर्दा हिउँदे अधिवेशन नै अनिश्चित भएको छ ।’ उनले प्रमुख र उपप्रमुख दुबैजना काम र जिम्मेवारीप्रति त्यति सिरियस नभएको बताए । ‘उहाँहरु दुबैजना बेलाबेला कहाँ–कहाँ गायव हुनुहुन्छ, हामीलाई केही थाहा हुँदैन । तर, विवाद उहाँहरुले निकाल्नुहुन्छ’, उनले भने, ‘तत्काल बसेर छलफल गरेर समस्या समाधान गर्नुपर्छ ।’

नगर प्रवक्ता समेत रहेका वडा नं. ४ का वडाध्यक्ष मुक्तिनाथ यादवले बोर्ड बैठक बस्न नसक्नु र हिउँदे अधिवेशन आह्वान हुन नसक्नुको कारण नगर प्रमुखले दिनुपर्ने बताए । ‘प्रमुख भनेको नगरको अभिभावक हो, तर यहाँ प्रमुखबाट त्यो व्यवहार भएको छैन’, उनले भने, ‘अभिभावकले कहाँ कस्तो योजना पार्ने, असन्तुष्टहरुलाई सन्तुष्ट पार्ने लगायतका काम गर्नुपर्ने हो । कुनै पनि काम प्रमुखले गर्नुभएको छैन । त्यसैले राप्रपा प्रमुखको कामप्रति पुरै असन्तुष्ट छ ।’ यादवले काँग्रेस र एमालेको गठबन्धन भए पनि यी दुई दल नमिल्दा कामहरु प्रभावित भएको बताए । यसबारे बुझ्न खोज्दा नगर प्रमुख खाँले फोन रिसिभ गरेनन् ।