सामाजिक कामका लागि स्रोत जुटाउन सांगितिक कार्यक्रम

भैरहवा– विभिन्न सामाजिक कार्य संचालनका लागि आर्थिक स्रोत जुटाउन लायन्स क्लब अफ सिद्धार्थनगर गौतम बुद्धले यही भदौ २८ गते भैरहवामा सांगितिक कार्यक्रम गर्ने भएको छ ।

Advertisement

यसबारेमा जानकारी दिन आइतबार भैरहवामा आयोजित पत्रकार सम्मेलनमा कार्यक्रम संयोजक राजु बस्नेतले क्लबको कर्पोरेट नाइट सिजन–२ अन्तर्गत सांगितिक कार्यक्रमको आयोजना गरिएको र यसबाट बचेको रकम विभिन्न सामाजिक कार्यमा खर्च गरिने बताए ।

उक्त कार्यक्रममा राष्ट्रिय कलाकार कमल खत्रीसहित स्थानीय कलाकारहरुले आफ्नो प्रस्तुती दिने छन् । २८ गते साँझ भैरहवाको गल्लामण्डिस्थित दरबार ब्याङ्क्वेटमा कार्यक्रम संचालन हुनेछ । क्लबले यस अघि आयोजना गरेको कर्पोरेट नाइट सिजन–१ बाट संकलित रकम स्वास्थ्य, बातावरण, आध्यात्मिक लगायतका सामाजिक कार्यक्रममा खर्च गरेको थियो ।

क्लबका संस्थापक अध्यक्ष गौतमकुमार गुप्ताले क्लब स्थापना कालदेखि नै विभिन्न मानव सेवाका कार्यमा समर्पित रहेको जनाउँदै प्राकृतिक प्रकोप, बृक्षारोपण, बृद्धाश्रम अनाथाश्रम र विपन्न बिरामीको उपचारमा सहयोग गरिएको बताए ।

सांगितिक कार्यक्रमको आयोजना गर्नुको पछाडि अहिलेको व्यस्त मानव जीवनलाई केहीबेर भए पनि तनावमुक्त बनाउनु र विभिन्न कर्पोरेटमा आबद्ध व्यक्तिबीच आपसी सद्भाव र मित्रता कायम गर्नु पनि रहेको क्लवका अध्यक्ष सफी खानले बताए ।

अहिले आयोजना गर्न लागिएको सांगितिक कार्यक्रम झट्ट हेर्दा र सुन्दा मनोरञ्जनात्मक भए पनि यसबाट संकलित रकम अनाथ आश्रमको राहत सहयोग जुटाउने लक्ष्य रहेको आयोजकले जनाएका छन् ।