महिला सशक्तिकरणका लागि ‘मिसेज लुम्बिनी प्रदेश–२०२४’ प्रतियोगिता हुँदै

Advertisement

भैरहवा– रोटरी क्लब अफ लुम्बिनी सिद्धार्थनगरले पहिलो पटक ‘मिसेज लुम्बिनी प्रदेश–२०२४’ प्रतियोगिता गर्ने भएको छ । महिलामा भएका अन्तरनिहीत विभिन्न प्रतिभालाई उजागर गर्दै महिला सशक्तिकरणमा टेवा पुर्याउने यसको मुख्य उद्देश्य हो ।

Advertisement

आइतवार भैरहवामा पत्रकार सम्मेलन गर्दै आगामी मंसिर १५ गते भैरहवामा पहिलो पटक लुम्बिनी प्रदेशस्तरीय मिसेज लुम्बिनी प्रतियोगिता आयोजना गरिएको आयोजकले जनाएका छन् । प्रतियोगिताबाट बचेको रकमबाट छात्रा शिक्षामा र आईसीयु जडित एम्बुलेन्स खरिद गर्ने लक्ष्य रहेको क्लबका अध्यक्ष जैशीले जानकारी दिए ।

क्लबका अध्यक्ष जैशीले विभिन्न प्रतिभा भएर पनि विवाह पश्चात् घरको कार्यव्यस्तताले उजागर गर्ने मौका नपाएका सर्वसाधारण महिलाका लागि यो प्रतियोगिता अवसर हुने बताए । ‘महिला सशक्तिकरण यो प्रतियोगिताको अर्को पाटो हो’, अध्यक्ष जैशीले भने, ‘प्रतियोगिताबाट कति कम बच्छ, सोहीअनुसार बचेको रकम छात्रा शिक्षामा र आईसीयु जडित एम्बुलेन्स खरिदमा खर्च गरिने छ ।’

प्रतियोगिताका लागि सहभागी हुन चाहने महिलाहरुका लागि भदौ १७ सोमबारदेखि नै फर्म बितरण गरि कात्तिक १ गतेदेखि सहभागीका लागि रुपन्देही र दाङ जिल्लामा अडिसन राउण्ड संचालन गरिने छ । अडिसन राउण्डबाट छनोट भएका महिलाका लागि कात्तिक २३ देखि मंसिर ८ गतेसम्म क्लोज क्याम्प संचालन गरि विभिन्न बिधामा तालिम दिइने छ ।

प्रतियोगितामा २० वर्ष उमेर पुगेका र लुम्बिनी प्रदेश भित्र बसोवास गरेका महिलामात्र सहभागी हुन पाउने छन् । प्रतियोगितामा लुम्बिनी प्रदेशका १२ जिल्लाबाट न्युनतम ६० जना महिलाको प्रतिष्पर्धा रहने र २३ लाख रुपैयाँ खर्च लाग्ने अनुमान आयोजकले गरेका छन् ।

प्रतियोगिताकी संयोजक देवी गुरुङले सहभागी महिलाको आफ्नो परिचय प्रस्तुतीदेखि प्रतिभा र बौद्धिकतालाई छनोटको आधार मानिने बताइन् । ‘छनोट मूल्यांकनका लागि राष्ट्रिय र अन्तर्राष्ट्रिय स्तरका जर्जको निर्णय र भ्युअर्स भोटिङको पनि आधार मानिने छ’, गुरुङले भनिन्, ‘छनोट र मूल्यांकनको आधार सहभागीको सुन्दरतालाई मात्रै प्राथमिकता दिइने छैन ।’

लुम्बिनी प्रेस क्लवकी अध्यक्ष सम्झना शर्माले लुम्बिनी प्रदेश विभिन्न समुदायको मिश्रित बसोवास भएको प्रदेश भएकाले सबै सहभागी महिलाको समान सम्मान र मूल्यांकन हुने गरि कार्यक्रम संचालन गर्न सुझाव दिइन् । ‘कतिपय महिलालाई भाषाको समस्या पर्न सक्ने भएकाले यसतर्फ पनि ध्यान दिन जरुरी छ’, शर्माले भनिन् ।

प्रतियोगिताको विजेताले आकर्षक क्राउनसहित नगद ५१ हजार, फस्ट रनर–अपले क्राउनसहित नगद ३१ हजार र सेकेन्ड रनर–अपले क्राउनसहित सहित नगद २१ हजार रुपैयाँ प्राप्त गर्नेछन् ।