योजना सुरु गर्ने तर पूरा नगर्ने प्रवृत्ति रोक्न चाहन्छौंः मुख्यमन्त्री महरा

अर्घाखाँची– लुम्बिनी प्रदेशका मुख्यमन्त्री जोखबहादुर महराले प्रदेश सरकारले अघि बढाएका गौरवका योजनाहरुलाई पूरा गर्ने जनाएका छन् । उनले कसले योजना अघि सार्यो भन्दा पनि काम भयो, भएन ? भन्ने कुरामा विशेष ध्यान दिएर गौरवका योजना समयमै सक्नतर्फ लाग्ने जनाए ।

Advertisement

अर्धाखाँचीको शितगंगा नगरपालिका–३, ठाडामा सोमबार भएको कार्यक्रममा बोल्दै उनले भने, ‘विगतका सरकारले अघि बढाएका प्रदेश गौरवका आयोजनालाई वर्तमान सरकारले पूरा गर्नेछ । हामी यसमा निरन्तर लाग्छौं ।’

Advertisement

राजधानी निर्माणलगायत सडक पूर्वाधार, शिक्षा, स्वास्थ्य, कृषि, सिँचाइलगायतका क्षेत्रमा थालिएका प्रदेश गौरवका आयोजनालाई गति दिइने उनको प्रतिवद्धता छ । उनले प्रदेशका १२ जिल्लाको राजधानीमा सहज पहुँचका लागि सडक सञ्जालले जोड्ने गरी काम भइरहेको जानकारी दिए ।

‘लुम्बिनी प्रदेश सरकारले अघि बढाएका राम्रा र गौरवका आयोजनालाई पूर्णता दिन हामीले ध्यान दिन्छौं,’ उनले भने, ‘योजना सुरु गर्ने तर पूरा नगर्ने प्रवृत्ति रोक्न चाहन्छौं ।’ उनले अब छिट्टै मन्त्रिमण्डललाई पूर्णता दिइने र सरकारको कामलाई तिव्रता दिने जनाए ।

यस्तै, मन्त्री चेतनारायण आचार्यले प्रदेश सरकारले कार्यसम्पादनलाई तीव्र पार्ने र जनतामा आशा जगाउने बताए । ‘यो सरकारलाई कुनै विलम्ब गर्ने छुट छैन’, उनले भने, ‘जनताका आशा र अपेक्षा अनुसार काम गर्छौं । ढिलासुस्तीलाई रोक्छौ ।’