ढुङ्गा अनि देवता

मूर्तिकारले कुँद्छ अनेक आकृति
काल्पनिक अनि सुन्दर प्रकृति
अक्षता फूलपाती कोही आई चढाउँछ
त्यो ढुङ्गो अब देवता कहलाउँछ

Advertisement

गहिरो आस्थाले पुज्छ कोटीकोटी
निधारले छुन्छ हातपाउ टेकी
भेटी चढाई आशीष माग्छ
त्यो ढुङ्गो अब देवता बन्छ

Advertisement

चारै दिशामा पर्खाल ठड्याई
धूरीमा सुनको गजुर टल्काई
मन्दिरभित्र कैद हुन्छ
त्यो ढुङ्गो अब देवता बन्छ

साँझ बिहान आरति गरी
धुप नैवेद्मका वासना छरी
शंख घण्टका धुन गुञ्जन्छ
त्यो ढुङ्गो अब देवता बन्छ

गाउँघरदेखि शहरसम्मै
फैलन्छ महिमा यसको अचम्मै
भाकल बोकी भक्तजन धाउँछन्
यसरी ढुङ्गोलाई देवता बनाउँछन् । -sahityapost