नगरबाट तलब–भत्ता खाने सबैले छोराछोरी सामुदायिक विद्यालयमा पढाउनु पर्ने

परासी– यहाँको एक पालिकाले नगरपालिकाबाट तलब सुविधा लिने जनप्रतिनिधि, कर्मचारी, शिक्षकले आफ्ना छोराछोरीलाई अनिवार्य रूपमा सामुदायिक विद्यालय पढाउनुपर्ने नीति बनाएको छ । पश्चिम नवलपरासीको सुनवल नगरपालिकाले यस्तो नीति बनाएको हो ।

Advertisement

चालु आर्थिक वर्षको नीति तथा कार्यक्रमअनुसार नगरका जनप्रतिनिधि, शिक्षक र कर्मचारीहरूले आफ्ना सन्तानलाई आगामी शैक्षिक सत्रदेखि सामुदायिक विद्यालयमा भर्ना गर्न अनिवार्य गरिएको हो । नगरपालिकाभित्र ३५ वटा सामुदायिक विद्यालय छन् भने नगरपालिकाको कोषबाट तलब भत्ता तथा सेवासुविधा लिने ३ सय ६७ जना जना छन् ।

Advertisement

उनीहरुले अब सामुदायिक विद्यालयमा छोराछोरी पढाउनुपर्ने छ । सुनवल नगरपालिकाका प्रमुख विमला अर्यालले सामुदायिक विद्यालयमा नपढाए कारबाही गरिने जनाइन् । उनले भनिन्, ‘समाज परिवर्तन गर्न जनप्रतिनिधि भएका र सरकारी कोषबाट तलब खानेले नै सामुदायिक विद्यालयलाई विश्वास नगरेपछि सर्वसाधारणले कसरी गर्ने ?’ ।

उनले नगरका सामुदायिक विद्यालय पनि अब्बल रहेको बताइन् । ‘कमजोर विद्यालयलाई सुधार गर्दै जाने हो । त्यसैले नगरको कोष मार्फत तलब भत्ता खाने सबैलाई सामुदायिक विद्यालयमा आफ्ना छोराछोरी भर्ना गर्न अनिवार्य गरेका हौँ ।’