लुम्बिनीमा संचालित मोन्लम पुजामा हलिउड सुपरस्टार जेट ली

लुम्बिनी– बुद्ध जन्मस्थल लुम्बिनीमा आयोजित मोन्लम अर्थात् विश्व शान्ति पुजामा चिनियाँ चर्चित चलचित्रकर्मी एवं हलिउड सुपरस्टार जेट ली पनि सहभागी भएका छन् । बिहीबारदेखि लुम्बिनीस्थित मायादेवी मन्दिर परिसरमा पाँच दिवसीय मोन्लम पुजा सुरु भएको छ ।

Advertisement

मोन्लममा पाँच सय बढी रिम्पोछे, लामा, आनीहरु एकै ठाउँमा भेला भई मन्त्रोच्चारण र पाठ गर्दा समस्त लुम्बिनी गुञ्जायमान भएको छ । जेट ली पनि बिहानैदेखि साँझसम्म पुजामा सहभागी भएर पाठ गरिरहेका छन् ।

Advertisement

सन् १९६३ अप्रिल २६ मा चीनको बेजिङमा जन्मिएका हुन् । अभिनेता, मार्शल आर्टिस्ट तथा चलचित्र–निर्माता र हलिउड सुपरस्टार समेत रहेका उनी सयौं फिल्म खेलेका छन् । कुनै समय उनका चर्चित फिल्मले हलिउडमा चहलपहल नै ल्याएको थियो । जेट ली मोन्लम पुजामा सहभागी हुन आफ्ना सहयोगी सहित लुम्बिनी आएका छन् ।

उनी अहिले पनि फिल्म क्षेत्रमा सक्रिय छन् । लुम्बिनीबाट विश्व शान्तिको कामना गर्ने र सन्देश दिने उद्देश्यसहित महायानी परम्परा अनुसार मोन्लम पुजा सुरु भएको छ । जेट लीको सहभागिताले विश्व पर्यटन बजारमा थप सकारात्मक सन्देश जाने लुम्बिनी विकास कोषले जनाएको छ ।

लुम्बिनी आएका जेट ली लाई विकास कोषका प्रशासकीय प्रमुख ज्ञानिन राईले लुम्बिनीको ऐतिहासिकता, विकास र पछिल्लो अवस्थाबारे जानकारी गराएका थिए । लुम्बिनी विकास कोषका उपाध्यक्ष डा.ल्हारक्याल लामाले जेट लीको सहभागिताले मोन्लम पुजाको सान्दर्भिकता र औचित्यलाई थप पुष्टि गरेको जनाए ।

‘विश्व प्रख्यात सुपरस्टारको सहभागिताले यो पुजा अन्तर्राष्ट्रियकरण भएको छ । लुम्बिनीको आध्यात्मिकता र प्रचारप्रसार अझै हुने निश्चित छ’, उनले भने । नियमित मोन्लम पुजामा सहभागी भइरहेका जेट ली पाँच दिन नै लुम्बिनीमा रहनेछन् । यहाँ रहँदा उनले लुम्बिनीमा रहेका विभिन्न गुम्बाहरुको अवलोकन गर्ने र पुजाआजामा सहभागी हुने छन् । पुजामा सहभागी जेट लीले भने कुनै प्रतिक्रिया दिन खोजेनन् ।